राष्ट्रीय जनता दल (राजद) लोकसभा चुनावक लेल पार्टीक घोषणापत्र जारी कऽ देलक अछि। तेजस्वी यादव कहलनि जे हम लोकसभा चुनावक लेल २४ टा जनवचन लऽ कऽ आयल छी । जँ केंद्रमे इंडिया गठबंधनक सरकार बनत तऽ हम बिहारकेँ विशेष राज्यक दर्जा दियायब। विशेष पैकेज अलगसँ देल जाएत। महंगाई कम करैत रसोई गैस सिलेंडर ५०० रुपयामे देल जायत।
तेजस्वी यादव कहलनि जे १५ अगस्तसँ देशक युवा बेरोजगारीसँ मुक्त भऽ जाएत। जँ सरकार बनैत अछि तऽ ३० लाख रिक्त पदक लेल नियुक्ति प्रक्रिया १५ अगस्तसँ शुरू होएत। ७० लाख नव पद सृजित होएत। यानी कुल एक करोड़ युवाकेँ सरकारी नौकरी देल जाएत। बेरोजगारी सबसँ पैघ दुश्मन अछि। भाजपाक लोक एहि बारेमे बात नहिं कयलक, ओ २ करोड़ नौकरी देबय केर वादा कयने छल, मुदा हम जे कहैत छी से करैत छी।
राजद नेता तेजस्वी कहलनि जे केंद्रमे सरकार बनला पर पुरान पेंशन योजना लागू कयल जायत। बतबैत चली जे बहुत रास राज्यमे सरकारी कर्मचारी पुरान पेंशन योजनाकेँ लागू करय केर मांग बहुत दिनसँ करैत आबि रहल अछि। हम से लागू करब।
राजदक घोषणापत्र जारी करैत तेजस्वी यादव कहलनि कि रक्षाबंधनसँ ओ गरीब बहिनकेँ हर साल एक लाख रुपया केर आर्थिक सहायता देताह। हम गरीब परिवारक बहिनकेँ हर साल ५०० टाकामे गैस सिलेंडर देब।
तेजस्वी यादव कहलनि “हम बिहारमे बेहतर कनेक्टिविटीक लेल पूर्णिया, भागलपुर, मुजफ्फरपुर, गोपालगंज आ रक्सौलमे पांच टा नव हवाई अड्डा बनायब।
राजद अपन घोषणापत्रमे हर महीना जनताकेँ २०० यूनिट मुफ्त बिजली देबाक वादा कयलनि अछि। तेजस्वी कहलनि कि किसानकेँ १० टा फसलक समर्थन मूल्य (एमएसपी) भेटत। हम स्वामीनाथन आयोगक सिफारिश लागू करब।
तेजस्वी कहलनि जे इंडिया गठबंधनकेँ सत्तामे अबैत अग्निवीर योजना बंद कऽ देल जायत। कर्तव्यक पालन करैत मृत्युक स्थितिमे अर्धसैनिक बलकेँ शहीदक दर्जा देल जायत। बतबैत चली जे राजद सहित इंडिया गठबंधनक दल शुरूसँ अग्निवीर योजनाक विरोध करैत आबि रहल अछि।
