मिथिला क्षेत्रीय बिहारक सीतामढ़ीसँ जदयू केर नवनिर्वाचित सांसद देवेश चन्द्र ठाकुरक बयान पर राजनीति गर्म भऽ गेल अछि। राजद आ कांग्रेस एहि बयान पर जदयू सांसदक मंशा पर सवाल उठौलक, जखनि कि भाजपा बचावमे आयल।
वास्तवमे मिथिलाक हृदयस्थली सीतामढ़ीसँ जदयू केर नवनिर्वाचित सांसद देवेश चन्द्र ठाकुर अपन लोकसभा क्षेत्रक कार्यकर्ता सभकेँ संबोधित करैत कम वोटसँ जीतबाक कारण बता रहल छलाह। एहि दौरान अचानक हुनक दर्द छलकि पड़ल। सांसद देवेश चन्द्र ठाकुर कहलनि जे ओ बहुत दिनसँ राजनीतिमे सक्रिय छथि। एहि अवधिमे ओ यादव आ मुसलमान लोकक अधिकांश काज कयलनि। लेकिन, आब ओ यादव आ मुसलमानक काज नहिं करताह। जँ एहि समुदायक कियो एतय काज करबा लेल अबैत अछि तखन ओ हुनका चाह आ नाश्ता जरूर देताह। मुदा, ओ हुनक काज नहि करताह।
एहि बयानक बाद कांग्रेस आ राजद नेता नाराज भऽ गेलाह। राजद प्रवक्ता ऋषि मिश्रा कहलनि जे देवेश ठाकुर बहुत दिन तक विधान परिषदक सभापति रहल छथि। एहन स्थितिमे एहन बयान सही नहिं अछि। आब ओ क्षेत्रक सांसद छथि आ पूरा क्षेत्रक विकास हुनक जिम्मेदारी अछि।
युवा कांग्रेसक पूर्व प्रदेश अध्यक्ष ललन कुमार यादव कहलनि जे ई संगतक प्रभाव अछि। भाजपाक संग गेलाक बाद जेडीयूक नेता लोकनि सेहो धर्म आ जाति देखय लगलाह। चुनावमे के केकरा वोट दैत अछि, नहिं दैत अछि, ई चुनाव तक सीमित रहैत अछि। देवेश ठाकुर सम्पूर्ण सीतामढ़ी क्षेत्रसँ सांसद चुनल गेल छथि। जँ सभ जनप्रतिनिधि एना करब शुरू कऽ देताह तखन की होयत ?
दोसर दिस भाजपा नवनिर्वाचित सांसदक बचावमे आबि गेल अछि। भाजपा प्रवक्ता कुंतल कृष्ण कहलनि जे सांसद भावनामे बहि कार्यकर्ता सभक बीच अपन विचार व्यक्त कयलनि। एहन बात भावनामे आबि निकलि गेल होएत। एकर दोसर माने नहिं निकालबाक चाही।
