राजस्व कर्मिक हड़तालक बीच विभागीय पत्र जारी भेल अछि। संबंधित जिलाक डीएमकेँ आदेश देल गेल अछि कि ‘जे बात नहि मानय ओकरा पर कार्यवाही कयल जाए।’
कर्मिक हड़ताल पर राजस्व आ भूमि सुधार विभाग सख्त भऽ गेल अछि। अपर मुख्य सचिव दीपक कुमार सिंह संबंधित जिलाधिकारीकेँ पत्र लिखलनि। हुनका आदेश देल गेल अछि जे पहिने हड़ताली कर्मिकेँ बुझाबयक प्रयास कयल जाय। नहि मानऽ पर अनुशासनात्मक कार्यवाहीक अनुमति देल जायत। पत्रमे कहल गेल अछि, “कतेको जिलामे राजस्व कर्मिक हड़ताल पर जाए केर सूचना भेंटल अछि। एहेनमे विभागक काज प्रभावित भऽ रहल अछि।”
अपर मुख्य सचिव द्वारा सम्बंधित जिलाक डीएमसँ हड़ताल खत्म करवाबै केर आदेश देल गेल अछि। ओ कहलनि जे कर्मचारीसँ बातचीत कय आंदोलन खत्म करेबाक रास्ता निकालल जाए। हड़ताली कर्मचारि सभकें पहिने बुझायल जाए। नहि मानला पर आंदोलनरत कर्मचारी सभक खिलाफ कार्यवाही कयल जाए।
पत्रमे आगू कहल गेल जे कार्यवाहीक रिपोर्ट विभागीय मुख्यालयकेँ सेहो जल्दी पठाओल जाए। आगू निर्देश दैत कहल गेल जे कोनो जिलामे राजस्व कर्मी आकस्मिक हड़ताल पर नहि जाए।
आंदोलनरत कर्मचाऱीक मांग पर राजस्व आ भूमि सुधार विभाग गंभीरतासँ कार्यवाही करबाक आश्वासन देलनि अछि।
असलमे, राजस्व कर्मिक एक गुट राज्य मुख्यालयकेँ समस्या आ मांगक संबंधमे ज्ञापन देलक। विभागक कहब अछि जे मांग पर गंभीरतासँ विचार कएल जा रहल अछि। कतेको बिंदु पर वित्त विभागक सहमति आ राज्य सरकारक अनुमोदनक आवश्यकता अछि। सरकारसँ हरियर झंडी मिललाक बादे फैसला लेबाक संभावना अछि। राजस्व आ भूमि सुधार विभाग अनुमतिक इंतजार कय रहल अछि। एहिसँ मांग पर फैसला लेबामे समय लगबाक संभावना अछि।
