‘मधुबनी समदिया
*
मधुबनी शहरक क्रमशः आर.के. काॅलेज, जे.एन.काॅलेज, जेएमडीपीएल महिला काॅलेज एवं डीएनवाई काॅलेजक प्राचार्यकेँ सौंपल गेल निवेदन-ज्ञापन।
‘मैथिल पुनर्जागरण प्रकाश फोरम’क निःशुल्क “पुनर्जागरण शिक्षण-प्रशिक्षण अभियान”क अंतर्गत बुधकेँ एकटा चारि सदस्यीय दल मधुबनी शहरक चारिटा काॅलेजमे प्राचार्यकेँ निवेदन-ज्ञापन सौंपल आ उद्देश्यसँ अवगत कराओल। चारु काॅलेजक प्राचार्य एहि महत्वपूर्ण काजक लेल पूर्ण सहयोगक आश्वासन देलनि।
सर्वप्रथम पुनर्जागरण शिक्षण-प्रशिक्षण दल आर.के.काॅलेजमे प्राचार्य डाॅ. अनिल कुमार मंडलसँ भेंट कयल, डाॅ. मंडल त्वरित सभ बातकेँ बुझैत काॅलेजक छात्र-छात्राकेँ जानकारी देबय केर संगहि आर आवश्यक सहयोग देबय केर आश्वासन देलनि।
तदुपरांत दल पहुँचल जे.एन. काॅलेज जतय प्राचार्य डाॅ. फुलो पासवानकेँ निवेदन-ज्ञापन सौंपल, डाॅ फुलो पासवान एहि काजक प्रसंशा करैत पूरजोर सहयोग करय केर आश्वासन देलनि।
तत्पश्चात जेएमडीपीएल महिला काॅलेजमे ई पुनर्जागरण दल पहुँचल, जतय प्राचार्य डाॅ. अनिल कुमार चौधरीकेँ निवेदन-ज्ञापन सौंपल गेल। डाॅ. अनिल कुमार चौधरी सेहो एहि काजक लेल पूर्ण सहयोगक आश्वासन देलनि।
पुनश्च ‘पुनर्जागरण शिक्षण-प्रशिक्षण’ चारि सदस्यीय दल डी.एन.वाई कालेज मधुबनीक प्राचार्य डाॅ. चंद्रशेखर पाण्डेयसँ भेंट कयल आ निवेदन-ज्ञापन सौंपल। डाॅ. चंद्रशेखर पाण्डेय सेहो पूर्ण सहयोगक आश्वासन देलनि।
विशेष जनतब जे दरभंगा युनिवर्सिटीक वीसी सभ काॅलेजकेँ चिट्ठी द्वारा निर्देशित कयलक अछि जे काॅलेजक नाम एवं विभाग आदिक नाम मिथिलाक्षरमे सेहो लिखल जाए। एहि संबंधमे चारु काॅलेजक प्राचार्य एकर चर्चा कयलनि। हुनका सभकेँ एहि काजक लेल ‘मिथिलाक्षर साक्षरता अभियान’ पूरा सहयोग करत तकर पुनर्जागरण शिक्षण-प्रशिक्षण दल उत्साहपूर्वक आश्वासन देलक। संस्थापक अजय नाथ झा शास्त्री एहि लेल विसी समेत सभ प्राचार्यक प्रसंशा करैत आभार व्यक्त कयलनि आ संगहि संग एहि काजक लेल फोरमक उपक्रम ‘मिथिलाक पहिचान मिथिलाक्षर निशान’क उद्देश्यक जानकारी देलनि।
चार सदस्यीय दलमे कुन्दन आनंद, पुष्पेन्द्र कुमार, प्रमोद कुमार झा एवं अजय नाथ झा शास्त्री सम्मिलित छलथि।
