पुनर्जागरण शिक्षण-प्रशिक्षणक कम्प्यूटर वर्गमे एक्सपर्ट सेशन
मधुबनी समदिया!! ‘मैथिल पुनर्जागरण प्रकाश फोरम’क पुनर्जागरण शिक्षण-प्रशिक्षणक उद्येश्य विद्यार्थी सभकेँ कौशल विकासक लेल वास्तविक रुपसँ प्रशिक्षित करब आ संगहि करियर रोजगार धरि पहुँच बनायब अछि। एहि लेल मधुबनीमे जारी एकर कम्प्यूटर वर्गमे शुक्रकेँ संबंधित विशेषज्ञ कम्प्यूटर वर्गमे विद्यार्थी सभकेँ मार्गदर्शन कयलनि एवं विद्यार्थीगण खुब उत्साहित एवं प्रेरित भेलथि।
संस्थान एहि लेल विशेष व्यवस्थाक अन्तर्गत विशेषज्ञकेँ मार्गदर्शन हेतु बजौने छल। करियर एक्सपर्ट आलोक चौधरीक कौशल विकास एवं करियरसँ संबंधित प्रेरक मार्गदर्शन एवं अनेक सरकारी- गैर-सरकारी अनबुझ योजनाक खुलासासँ विद्यार्थीगण प्रभावित भेलथि आ स्किल सिखय एवं करियर रोजगारक प्रति शुरुआतेसँ प्रयासक लेल प्रेरित भेलथि।
एक्सपर्ट सेशनमे करियर एक्सपर्ट आलोक चौधरी प्रशिक्षार्थी सभसँ पहिने परिचय-पात करैत वार्तालापक वातावरण अनुकूल बनबैत सबहक शिक्षा एवं रुचि जानय केर प्रयास कयलनि। पुनः बच्चा सभक बिच सरकारक बहुत रास योजनाक जानकारी देल गेल जाहिसँ बच्चा सभ सिधा लाभन्वित भऽ सकैथ। ओ कहलनि जे राज्य सरकार एवं केन्द्र सरकारक बहुत रास योजना ठिकसँ लाभार्थी धरि पहुँचि नहिं पाबैत अछि वा ठिकसँ बुझाओल नहिं जयबाक कारण बहुत गोटे वंचित रहि जाइत अछि, ई अहाँ सभकेँ बुझय केर चाही एवं ताहि क्रममे बिहार सकारक तथा भारत सरकारक अनेक योजनाक जानकारी दऽ हुनक सभकेँ योजनासँ लाभ लेबाक लेल उत्सहित कयलनि।
संगहि संस्थापक अजय नाथ झा शास्त्रीक उपस्थितिमे संस्थाक तरफसँ हर सम्भव सहयोग करबाक आश्वासन देलनि।
तकर अनुमोदन करैत अजय नाथ झा शास्त्री कहलनि जे ‘मैथिल पुनर्जागरण प्रकाश फोरम अहीँ सभक खातिर छैक, मिथिलावासीक बच्चाकेँ यथासंभव शिक्षण-प्रशिक्षण द्वारा योग्य मार्ग पर आनि मिथिलेमे रहि अपन कौशल एवं शिक्षाक माध्यमसँ रोजगार पाबैत पलायन नहिं मात्र रोकब, बल्कि पलायित मिथिलावासीकेँ घर घुरायब फोरमक संकल्प छैक, तें ई फोरम हर तरहसँ अहाँ सबहक सहायक बनत आ ताही क्रममे ई एक्सपर्टकेँ बजा विशेष मार्गदर्शन दिआओल जा रहल अछि।
पुनः विशेषज्ञ आलोक चौधरी छात्र-छात्रा सभकेँ कौशल विकास करबा हेतु विभिन कार्यक्रमक जानकारी सेहो देलनि जाहिमे कतेको पूर्णतः नि:शुल्क रहैत अछि । छात्र सभकेँ विभिन कार्यक्रमक जानकारी सेहो देल गेल जे कयलाक बाद ओ सुगमतासँ अपन जीविकोपर्जन घरे पर रहि कऽ सकैत छथि।
एक्सपर्ट सेशनमे नियमित प्रशिक्षक राकेश कुमार दास, प्रबंधक संजय कुमार झा समेत प्रशिक्षुगणमे :- सीमा कुमारी, शिवम कुमार, रविता कुमारी, स्नेहा कुमारी, आदित्य कुमार, आयुष राज, रजनीश रंजन, अंशिका शर्मा, हनीस कुमार, नेहा कुमारी, श्याम कुमार, अखिलेश कुमार यादव, फातमा, रोकसार खातुन, मुस्कान खातुन, नेहा खातुन, राजा कुमार, मुकेश साहु, सरोज कुमार यादव, सुरज कुमार यादव उपस्थित छलथि।
