प्रशांत किशोर बिहारक मुख्यमंत्री नीतीश कुमार पर आरोप लगओलनि अछि जे ओ २०२५ केर बादो सत्तामे रहबाक लेल पीएम मोदीक पैर छू रहल छथि, जाहिसँ २०२५ केर बादो मुख्यमंत्री बनबाक लेल भाजपाक समर्थन भेटैत रहय।
एहि सालक लोकसभा चुनावक परिणामक बाद एनडीए नेता आ नवनिर्वाचित सांसदक बैसार भेल, जाहि दौरान बिहारक मुख्यमंत्री नीतीश कुमार प्रधानमंत्री नरेन्द्र मोदीक पैर छूबैत देखल गेलाह।
राजनीतिक रणनीतिकारसँ राजनीतिज्ञ बनल प्रशांत किशोर हालहिमे मुख्यमंत्री नीतीश कुमारपर आरोप लगओलनि जे ओ केवल ई सुनिश्चित करबाक लेल पीएम मोदीक पैर छू रहल छथि जे ओ सत्तामे बनल रहथि। ओ जन सुराज अभियानक बैसारक दौरान ई आरोप लगओलनि। शुक्र दिन १४ जूनकेँ एकटा सभा केर संबोधित करैत किशोर कहलनि कि देश किछु दिन पहिने देखने होएत जे मीडियाकर्मी कहि रहल छलथि जे नीतीश कुमारक हाथमे भारत सरकारक कमान अछि। जँ नीतीश कुमार नहिं चाहैथ तऽ देशमे सरकार नहिं बनत। एतेक शक्ति अछि नीतीश कुमारक हाथमे। ओ आगू कहलनि जे नीतीश कुमार एकरा लेल की कयलनि ? बिहारक बच्चा सभक लेल रोजगार नहिं माँगलनि, बिहारक जिलामे चीनी कारखाना शुरू करबाक माँग नहिं कयलनि। ओ लोकनि इहो माँग नहिं कयलनि जे बिहारकेँ विशेष दर्जा भेटबाक चाही।
बिहारक लोक सोचि रहल होयत जे ओ की माँगलथि। एहि सवालक जवाबमे किशोर कहलनि कि नीतीश कुमार बिहारक सब जनताक सम्मान बेचि अपन लेल सत्ता मांगने छथि, ओ मांग कयलनि जे २०२५ केर बाद सेहो मुख्यमंत्री बनल रहबाक चाही आ एहि लेल भाजपाकेँ हमरा समर्थन करय केर चाही। नीतीश पर अपन आरोप जारी रखैत ओ नीतीश पर हमला करैत कहलनि जे १३ करोड़ लोकक नेता छथि, जे हमर सभक अभिमान छथि, सम्मान छथि, ओ पुरा देशक सामने झुकिकेँ मुख्यमंत्री बनल रहबाक लेल पैर छूबि रहल छथि। प्रशांत किशोर जन सुराज अभियान शुरू कयलासँ पहिने जदयू केर राष्ट्रीय उपाध्यक्ष छलथि।
