मधुबनीमे बहुत जल्दिये एकटा आओर विश्वस्तरीय स्टेडियम बनय जा रहल अछि। एकरा लेल सरकारी स्तर पर पहल शुरू भऽ चुकल अछि। राजगीर खेल परिसरक भव्यताकेँ वैश्विक मान्यता भेटल अछि। हालहिमे एतय महिला एशियाई हॉकी चैंपियंस ट्रॉफी सफलतापूर्वक आयोजित कयल गेल छल। भारत, चीन, कोरिया, जापान, थाईलैंड, आ मलेशियाक टीम भाग लेलक। सभ टीमक कप्तान एहि खेल परिसरक प्रशंसा कयलनि।
एम्हर बिहार सरकार मधुबनी जिलामे खेल स्टेडियमक पुनर्निर्माणक लेल 20 करोड़सँ बेसीके मंजूरी देलक अछि। काज पूरा भेलाक बाद स्टेडियम जल्दिये नव रूपमे उपलब्ध होयत। खेल विभागकेँ जर्जर स्टेडियमक पुनर्निर्माणक लेल 20 करोड़ 37 लाख 28 हजार प्रशासनिक स्वीकृति भेटल अछि। एहि संबंधमे सरकारक उपसचिव निरंजन कुमार बिहारक राज्यपालक आदेश पर पटनाक महालेखाकारकेँ पत्र पठौने छलाह । विभाग द्वारा जहिना स्वीकृति भेटल, मधुबनीक लोक बड्ड प्रसन्न भेलाह।
मधुबनी स्टेडियमक निर्माण १९८७ मे भेल छल, ओहि समय एकर निर्माण पर लगभग ३५ लाख रुपया खर्च भेल छल। बादमे, विवादमे उलझलाक कारण, स्टेडियम साल-दर-साल बिगड़ैत गेल। सरकारी कार्यक्रम सेहो बंद कऽ देल गेल। वर्तमानमे एतय मात्र संरचना बचल अछि।
विधायक समीर महासेठ सदनमे कतेको बेर ई मुद्दा उठौने छथि। सरकारसँ स्वीकृति भेटलाक बाद आब एकर पुनर्निर्माणक रास्ता साफ भऽ गेल अछि। राशिक निकासी भवन निर्माण विभाग द्वारा कयल जायत। विधायक कहलनि जे एहि स्टेडियमक दुर्दशा पर कतेको सालसँ सवाल उठैत आबि रहल छी। हमरा कतेको बेर प्रश्न पूछल गेल अछि। आलोचनाक बादो हम एहि परियोजना पर लगातार प्रयास कयने छी आ आब स्वीकृति भेटलाक बाद नीक अनुभव करैत छी।
