मैथिलीक मूर्धन्य साहित्यकार आ साहित्य अकादमी पुरस्कार विजेता डॉ. ब्रजकिशोर वर्मा मणिपद्मक 39म पुण्यतिथि वृहस्पति दिन विद्यापति सेवा संस्थानक तत्वावधानमे मनाओल गेल। संस्थानक प्रधान कार्यालय परिसरमे आयोजित श्रद्धा सुमन अर्पण कार्यक्रममे संस्थानक महासचिव डॉ. बैद्यनाथ चौधरी बैजू कहलनि जे मणिपद्म मैथिली साहित्यकेँ जीवन पर्यंत खूब समृद्ध कयलनि। ओ अपन रचनासँ जतय मैथिलीकें आगाँ बढौलनि ओतहि संस्थान केर अध्यक्षक रूपमे एकरा समुचित दिशा आ गति प्रदान कयलनि। ओ कहा कहलनि जे हुनका समयमे जँ आइ सन प्रेस केर सुविधा रहैत त’ हुनक नाम सै सँ बेसी किताब जरूर होइत।
मैथिली अकादमीक पूर्व अध्यक्ष पं कमलाकांत झा, मणिपद्म केर कृति नैका बनिजाराक विस्तारसँ चर्चा कयलनि, जाहि लेल हुनका साहित्य अकादमी पुरस्कार भेटल छल।
मीडिया संयोजक प्रवीण कुमार झा पुण्यात्माकें श्रद्धा सुमन अर्पित करैत कहलनि जे अपन जीवनकालमे ओ साहित्यक विविध विधामे रचना क’ मैथिली साहित्यक अभूतपूर्व श्रीवृद्धि कयलनि।
कार्यक्रममे हालमे दिवंगत भेल मैथिलीक चर्चित साहित्यकार शरदिन्दु चौधरी ओ पूर्णेन्दु चौधरी आ संस्थानक मैथिली सेवी आजीवन सदस्य बैकुंठ चौधरी केर आत्माक चिर शांति लेल दू मिनटक मौन राखि श्रद्धांजलि अर्पित कयल गेलनि।
कार्यक्रममे संस्थानक कार्यकारी अध्यक्ष डॉ. बुचरू पासवान, सचिव प्रो जीवकांत मिश्र, प्रो रमेश झा, प्रो चंद्रशेखर झा बूढाभाई, विनोद कुमार झा, दुर्गानंद झा, आशीष चौधरी, प्रकाशचंद्र मिश्र आदि उपस्थित छलाह।
