भाजपाक वरिष्ठ नेता रविशंकर प्रसाद एक बेर फेर लालू प्रसाद पर तीक्षण प्रहार करैत कहलनि कि लालू प्रसादक पार्टीमे मात्र आ एकमात्र परिवारवादे अछि।
भाजपा सांसद रविशंकर प्रसाद मंगल कऽ भाजपाक प्रदेश कार्यालयमे मीडियासँ भेंट कयलनि, जतय ओ कहलनि कि लालू प्रसादक पार्टीमे परिवारक आगू किछु अछि की ? लालू प्रसादक पार्टीमे मात्र आ एकमात्र परिवारवाद अछि। हुनकर सामाजिक न्याय मात्र एकटा ढोंग अछि। रविशंकर प्रसाद नहिं केवल लालू यादव बल्कि तेजस्वी यादव पर सेहो हमला कयलथि।
भाजपा सांसद कहलनि, “हम खुलिकेँ बाजि रहल छी, हुनक पार्टीक एकटा साधारण गरीब यादव कार्यकर्ता वा हुनकर पार्टीक विधायकक कतेक पूछ अछि ? हमरा दिसि एकटा कार्यकर्ता मोहन यादव मध्य प्रदेश सन पैघ राज्यक मुख्यमंत्री बनि सकैत छथि। हुनका दिसि तऽ बस मात्र लालू जी, फेर राबड़ी जी, फेर तेजस्वी जी, तेजप्रतापजी, मीसाजी। हुनक सामाजिक न्याय दिखावा अछि।
आगा रविशंकर प्रसाद तेजस्वी यादवसँ सवाल करैत कहलनि जे हम अहांसँ एकटा सवाल पूछि रहल छी, ईमानदारीसँ तेजस्वी जी, की अहाँक सरकार दिल्लीमे बनत ? ईमानदारीसँ बताउ अहाँक प्रधानमंत्री के छथि। नहिं सरकार बनय जा रहल अछि आ नहिं प्रधानमंत्रीक उम्मीदवारक पता अछि।
दरअसल इंडिया गठबन्धन एखन धरि अपन प्रधानमन्त्री उम्मीदवारक चेहरा उजागर नहिं कयलक अछि, जाहि कारणेँ सत्तारूढ़ दलक लोक बेर-बेर ई प्रश्न उठबैत छथि जे मोदीक सोझाँ के अछि।
एकटा प्रश्नक उत्तरमे रविशंकर प्रसाद कहलनि जे ई नीक बात अछि जे हुनका बुद्धि भेटलनि। राम सबहक छथि, मुदा भगवान राम सेहो बुझैत छथि जे श्रीरामक प्रति ईमानदारीसँ भक्ति के करैत अछि आ के चुनावी भक्ति करैत अछि। पटना साहिब सीट पर कांग्रेस प्रत्याशीक नामक चर्चा पर ओ कहलनि जे हम सेहो खोजि रहल छी, अहाँसभ सेहो ताकू।
