पहिने राशनकार्डकेँ आधारसँ लिंक अर्थात आधार सिडिंग करेबाक अंतिम तिथि 31 मार्च धरि अनिवार्य कएल गेल छल। मुदा राहतक गप्प जे आब एकर अवधि 30 जून 2025 धरि बढ़ा देल गेल अछि।
खाद्य आ उपभोक्ता संरक्षण विभाग बिहार सरकार राशन कार्ड धारकसभक लेल अनिवार्य आधार सिडिंगक अंतिम तिथि बढ़ा देलक अछि। अंतिम तिथि बढ़ाएल जाएबासँ बिहारक कतेक कार्ड धारककेँ एकर लाभ भेटत। पहिने आधार सिडिंग करबाक अंतिम तिथि 31 मार्च छल। आब एकरा 30 जून 2025 धरि बढ़ा देल गेल अछि।
केंद्र सरकारक तरफसँ राष्ट्रीय खाद्य सुरक्षा अधिनियम 2013 अनुसार लक्षित जन वितरण प्रणालीक राशन कार्डमे अंकित प्रत्येक सदस्यक लेल 31 मार्च 2025 धरि आधार सिडिंग अनिवार्य कएल गेल छल। आब खाद्य आ उपभोक्ता संरक्षण विभाग बिहार सरकारक तरफसँ शुक्र (04 अप्रैल, 2025) केँ एकटा प्रेस रिलीज जारी क’ आधारक अनिवार्य सिडिंगक लेल समयक विस्तारक जानकारी देल गेल अछि।
खाद्य आ उपभोक्ता संरक्षण विभाग, बिहार द्वारा सूचना जारी कएल गेल अछि जे सभ राशन कार्ड धारकसँ निवेदन कएल गेल अछि जे अपन राशन कार्डमे अंकित प्रत्येक सदस्यक आधार सीडिंग 30 जून 2025 धरि जरूर करा लेब। एही लेल कखनो शुल्क नहि देबय परता। कियो गोटे किछु लक्षित जन वितरण प्रणाली विक्रेताक दुकान पर संधारित ईपीओएस यंत्रक माध्यमसँ आधार सीडिंग (ईकेवाईसी) करा सकैत अछि।
ई निर्देशन देल गेल अछि जे राशन कार्डमे अंकित कोनो सदस्यक आधार सीडिंग जँ 30 जून तक नहि कएल जायत तऽ हुनक नाम राशन कार्डसँ (01 जुलाई 2025 केर प्रभाव सँ) हटा देल जायत। लाभुक परिवारकेँ ओकर लाभ नहि देल जायत। ओ वंचित भऽ जायत। एहेन स्थितिमे जखनि आधार सीडिंगक तिथि बढ़ा देल गेल छैक, त एहि निश्चित अवधिमे एकरा जरूर करा लिअ, नहि तऽ परेशानी भऽ सकैत अछि।
