पुलिस रियल एस्टेट व्यवसायमे शामिल मधुसूदन राय उर्फ मधु रायक हत्याक मामिलाक खुलासा कयलक आ चारिटा आरोपीकेँ बंदी बनौलक। मधुसूदन रायकेँ १५ दिसंबरकेँ शहरक नामकुम क्षेत्रमे दिनदेखारे गोली मारि हत्या कऽ देल गेल छल। डीआईजी आ रांचीक एसएसपी चंदन कुमार सिन्हा बृहस्पतिकेँ एकटा प्रेस कॉन्फ्रेंसमे कहलनि कि गिरफ्तार अपराधी मे मनवेल खलखो, अशोक सिंह, राजकिशोर राय एवं दीपक राय शामिल अछि। हत्यामे प्रयुक्त हथियार सेहो बरामद कयल गेल अछि। गिरफ्तार आरोपी सभ पुलिसक सोझाँ अपन अपराध स्वीकार कऽ लेने अछि। खबरि छल जे मधु रायक हत्या नामकुममे आठ एकड़ जमीनक मालिकाना हक पर विवाद हालहिमे भेल छल।
घटनाक दिन मधु राय स्कूटीसँ नामकुम थाना क्षेत्रक राजाउलातू उनीडीह स्थित घरसँ अन्यत्र कतौ जाय लेल निकललाह। कवाली नामक जगह लग अपराधी हुनका घेरि कऽ गोली मारी देलक। मधुसूदन राय मौका पर दम तोड़ी देलनि। एही वारदातक विरोधमे स्थानीय लोकसभ सड़क जाम कऽ देने छल।
एसएसपी एही हत्याकांडक जांचक लेल मुख्यालय डीएसपी अमर कुमार पांडे’क अगुवाईमे एसआईटी (स्पेशल इन्वेस्टिगेटिंग टीम) केर गठन कयने छल। जाहिमे तकनीकी साक्ष्यक आधार पर शूटर सहित चारि लोकके बंदी बनाओल गेल अछि।
ग्रामीण एसपी सुमित कुमार अग्रवाल एहि मामिलाक जांचक निगरानी कऽ रहल छलाह। लगभग पन्द्रह साल पहिने मधुसूदन रायक पत्नीकेँ सेहो नामकुमक रजौलातु क्षेत्रमे भूमि विवादक कारण गोली मारि हत्या कऽ देल गेल छल। खबरि छल जे ओहि हत्याकमे एकरे सभ के संलिप्तता छल।
