राजद खेमासँ पैघ खबर सामने आयल अछि, जतय राजदक पूर्व सांसद रामा सिंह पार्टीसँ इस्तीफा दऽ देलनि अछि। प्राप्त जानकारीक अनुसार बिहारक मजबूत नेता आ पूर्व सांसद रामा सिंह मंगल दिन राजदक प्राथमिक सदस्यतासँ इस्तीफा दऽ देलनि। कहल जा रहल अछि जे राजदक राष्ट्रीय अध्यक्ष लालू प्रसाद यादवकेँ इस्तीफा पत्र भेजने छथि।
बतबैत चली जे रामा सिंह हालहिमे राजदमे शामिल भेल छलाह। जानकारीक अनुसार रामा सिंह लोजपा राम विलासमे चिराग पासवानक पार्टीमे शामिल हेताह। रामा सिंह वैशाली वा शिवहरसँ लोकसभाक टिकट चाहैत छलाह। रामा सिंहकेँ टिकट नहिं भेटलाक कारण राजदसँ मोहभंग भेल। भरिसक इएह कारण भऽ सकैत अछि जे रामा सिंह राजदसँ इस्तीफा दऽ देलनि।
रामा सिंह पाँच बेर विधायक आ एक बेर सांसद रहि चुकल छथि। एक जमानामे ओ रामविलास पासवानक निकट छलाह। ९०क दशकमे रामा सिंहक नाम तेजीसँ उभरल। रामा सिंह वैशाली वा शिवहरसँ लोकसभाक टिकट चाहैत छलाह। मुदा राजद वैशालीसँ मुन्ना शुक्लाकेँ टीकट देलक अछि।
