बिहारक बक्सरसँ आरजेडी सांसद सुधाकर सिंह तेज प्रताप यादवक समर्थनमे उतरि आएल छथि। ओ कहलनि जे तेज प्रताप द्वारा किछु गुनाह नहि भेल अछि। रामविलास पासवान सेहो दुटा विवाह कय चुकल छथि।
बिहारक पूर्व मुख्यमंत्री लालू प्रसाद यादवक बेटा तेज प्रताप आ अनुष्का यादवक फोटो वीडियो वायरल मामिलामे परिवारक लोक नाराज अछि आ लालू प्रसाद यादव हुनका पार्टी आ परिवार दुनूसँ बाहर निकालि देलनि। आब तेज प्रतापक समर्थनमे आरजेडी सांसद सुधाकर सिंह उतरि आएल छथि। सुधाकर सिंह तेज प्रताप आ अनुष्का यादवक कथित रिश्ताकेँ जायज ठहरौने छथि। ओ कहलनि जे ई गुनाहक श्रेणीमे नहि अछि। संगहि ओ रामविलास पासवानक दुटा विवाहसँ तुलना कय देलनि।
ताहि पर चिराग पासवानक लोक जनशक्ति पार्टी रामविलासक प्रवक्ता कहलनि जे सुधाकर सिंहकेँ कानूनक ज्ञान नहि अछि आ आरजेडीकेँ बिना सिर-पैर’क बात करबाक फितरत रहल अछि।
लोजपा रामविलासक प्रदेश प्रवक्ता विनीत सिंह कहलनि, “आरजेडीमे अंतर्कलह अछि। कतेको तरहक गुटबाजी ओतय होइत अछि। हुनकर कतेको नेता बगैर सिर-पैर’क बात करैत छथि, ओहिमे सँ एकटा सुधाकर सिंह सेहो छथि। सांसद होइ केर नाते हुनका कानूनक बारेमे आइडिया होयबाक चाही। ओ आगू कहलनि, “हमर कानून कहैत अछि जे जा धरी पहिल पत्नीसँ कानूनी रूपसँ अलग नहि भेल छी, ता धरि दोसर विवाह करबाक अधिकार नहि अछि। कोर्ट एही बात पर संज्ञान लेत आ तेज प्रतापकेँ सजा होयत।
विनीत सिंह ई सेहो कहलनि, “जतय धरि हमर नेताक बात अछि तँ आरजेडीकेँ सभ किछु मालूम अछि जे हमर दिवंगत नेता पहिल पत्नीसँ पब्लिक्ली अलग रहबाक फैसला कएने छलथि आ तकर बाद ओ दोसर शादी कएलनि आ ई कानूनक दायरामे रहि कए कएल गेल छल। कानूनक सभ नियम केर पालन कए कएल गेल छल, मुदा तेज प्रताप यादव ई नहि कएलनि, एखनि धरि हुनकर तलाकक मामिला कोर्टमे विचारधीन अछि।
ओ तेजस्वी यादव पर निशाना साधैत बजलाह, आरजेडीक लोक बेर-बेर माय-बहिन योजना आ बहू बेटीक सम्मानक बात करैत अछि मुदा तेज प्रतापक हरकतसँ अंदाज लगाओल जा सकैत अछि जे बिहारक बहू बेटी कतेक सुरक्षित अछि, आरजेडीक कथनी आ करनीमे बहुत अंतर अछि।
