समाजवादी पार्टीक नेता रामगोपाल यादव मंगल दिन सदनमे इंस्टाग्राम पर रील बना कऽ समाजमे नग्नता पसारयवला लोकक आलोचना कयलनि। ओ कहलनि जे सोशल मीडियाक ई मंच समाजकेँ असभ्य बना देलक अछि, जाहि कारणेँ आइ पैघ संख्यामे हमर युवा पीड़ित भऽ रहल छथि।
ओ कहलखिन, एतबे नहि, सोशल मीडियाक कारण कतेको पैघ दुर्घटना सेहो भऽ रहल अछि। एहेन स्थितिमे वर्तमान सरकारक लेल ई जरूरी भऽ जाइत अछि जे ओ एकरा पर अंकुश लगाबय केर दिशामे सख्त कदम उठाबए। जँ समय पर एहि दिशामे कोनो डेग नहिं उठाओल जाइत अछि तँ स्थिति बेसी खतरनाक भऽ सकैत अछि।
समाजवादी पार्टीक सांसद रामगोपाल यादव राज्यसभामे बजैत छलाह। सपा नेता रामगोपाल यादव कहलनि, “हमर समयमे छठम कक्षामे स्कूलमे बच्चाकेँ अंग्रेजी पढ़ायल जाइत छल आ जखन बच्चा कने अंग्रेजी सीखैत छल तऽ शिक्षक ओकरा किछु वाक्य रटाबैत छल जेना, ‘वेल्थ इज लाॅस्ट नथिंग इज लाॅस्ट, हेल्थ इज लाॅस्ट समथिंग इज लाॅस्ट एंड कैरेक्टर इज लाॅस्ट एवरीथिंग इज लाॅस्ट।’
हमरा ई कहैत दुख भऽ रहल अछि जे हमरासभमे किछु एहन चैनल अछि जे हमर समाजमे लगातार अश्लीलता आ हिंसा फैला रहल अछि। एहने एकटा मंच अछि, जकर नाम इंस्टाग्राम रील्स अछि। देशक युवा पीढ़ी एखन एहि मंच पर तीन घंटा बर्बाद कऽ रहल अछि। हमर देशक युवा पीढ़ी अपन अनमोल समय बहुत अश्लील सामग्री देखबा लेल बर्बाद कऽ रहल अछि।”
ओ आगू कहलनि, “एहिसँ समाजमे बहुत विकृति उत्पन्न भऽ रहल अछि। रोज हम अखबारमे पढ़ैत छी जे इंस्टाग्राम पर हमर दोस्ती भेल, फेर विवाह भऽ गेल। एकर बाद लड़का लड़कीक हत्या कए देलक। कतहु लड़की लड़काक सभटा सामान चुरा लेलक आ चलि गेल। एहन घटना सभ दिन होइत अछि। हमर समाजमे इ होइत रहल अछि जे हम सभ पूरा परिवारक संग एकत्रित होइत आयल छी, मुदा आब एहि सोशल मीडियाक कारण इ नहिं भऽ रहल अछि। आब सब कियो फोनमे उलझि गेल अछि। एहेनमे आब संबंध कम भऽ रहल अछि। हमरासभकेँ सूचना भेटैत रहैत अछि जे बेटा पिताकेँ मारि देलक, ई भऽ रहल अछि किएक तँ आब प्रेम समाप्त भऽ रहल अछि। एकर अलावा सोशल मीडियाक एहि प्लेटफॉर्मक कारण लोक परिवारमे एक दोसरासँ संवाद नहिं कऽ पाबि रहल छथि, अन्यथा पहिने लोक परिवारमे खुलि कऽ गप्प करैत छल। एहि कारणेँ युवाकेँ बिगड़बाक संभावना कम होइत छल, मुदा आब एहेन नहिं अछि। एहि कारण एहेन स्थिति आबि गेल अछि।”
