राजद’क “कर्पूरी ठाकुरक पुण्यतिथिक उपलक्ष्यमे १७ फरवरीकेँ सोनबरसामे सभा

सीतामढ़ी
*

बिहार विधानसभा चुनावसँ पहिने सभ दल जाति जुटयबाक तैयारीमे लागल अछि। जातिक आधार पर वोट बैंककेँ मजबूत करबाक लेल सभ दल द्वारा पैघ रैलीक आयोजन कयल जा रहल अछि। आब राजद अति पिछड़ल समुदायसँ आयल जननेता कर्पूरी ठाकुरक समर्थन लऽ कऽ अति पिछड़ल मतदाताक आकर्षित करबाक तैयारी कऽ रहल अछि। कर्पूरी ठाकुरक विचार एही माध्यमसँ प्रत्येक व्यक्ति धरि पहुँचेबाक काज शुरू भऽ चुकल अछि।

कर्पूरी ठाकुरक ३७म पुण्यतिथिक उपलक्ष्यमे राजद द्वारा १७ फरवरीकेँ सीतामढ़ीक सोनबरसामे एकटा पैघ कार्यक्रमक आयोजन कयल जा रहल अछि। एहि कार्यक्रममे विपक्षक नेता तेजस्वी यादव सहित राजदक कतेको वरिष्ठ नेता उपस्थित रहताह। चारि दिन पहिने राजद राज्य कार्यालयसँ ११ टा कर्पूरी विचार रथ पठाओल गेल। एकर शुभारंभ पार्टीक प्रदेश महासचिव रणविजय साहू झंडी देखा कऽ रवाना कयलनि।

रणविजय साहू कहलनि जे ई रथ उत्तर बिहारक दरभंगा, मधुबनी, जाले आ सोनबरसाक क्षेत्रक भ्रमण करत आ कर्पूरी ठाकुरक विचार लोकक बीच पहुँचाओत। जाति जनगणनाक बाद नीतीश सरकार द्वारा बनाओल गेल आरक्षण नियमक मुद्दा सेहो एहि चुनावी सालमे राजद द्वारा उठाओल जायत।

रणविजय साहू कहलनि जे हम जनताक बीच जेबाक काज शुरू कऽ देने छी, जाहिमे हम जनताकेँ जानकारी देब जे जखनि तेजस्वी यादव महागठबंधन सरकारमे छलाह तखनि अत्यंत पिछड़ा आ पिछड़ा वर्गक 18 सँ 25 प्रतिशत आरक्षण देल गेल छल, मुदा केंद्र सरकारक मिलीभगतसँ उच्च न्यायालय एहि पर रोक लगा देलक। हम एहि मामिलाकेँ जनताक सामने सेहो लए जाएब। रणविजय साहू कहलनि जे वर्तमान सरकार अति पिछड़ल वर्गक अधिकारपर अत्याचार कऽ रहल अछि।

ई रथ ओहि क्षेत्रमे जायत जतय अति पिछड़ल वर्ग सामाजिक अन्यायक सामना कऽ रहल अछि, अपन अधिकार सुनिश्चित करबाक लेल। कुल मिला कऽ ई रथ १७ फरवरीक आयोजनकेँ सफल बनेबाक लेल सोनबरसामे आयोजित कार्यक्रममे लोकसभकेँ सेहो आमंत्रित करत। यदि ई कार्यक्रम सफल होइत अछि तँ निश्चित रूपसँ तेजस्वी यादवक लेल ई एकटा पैघ उपलब्धि होयत।

ओना कर्पूरी ठाकुरक नाम पर राजनीति मात्र राजद नहि बल्कि जदयू आ भाजपा द्वारा सेहो कयल जाइत अछि। नीतीश कुमार पहिने कहि चुकल छथि जे हम सब शुरूसँ कर्पूरी ठाकुरक विचारक आधार पर काज करैत आबि रहल छी। ओ वंशवादी राजनीतिक विरुद्ध छलाह आ हमसभ कहियो परिवारकेँ राजनीतिमे नहि अनलहुँ। एम्हर भाजपा कर्पूरी ठाकुरकेँ भारत रत्नसँ सम्मानित कऽ अति पिछड़ल समुदाय पर अपन अधिकारक दावा कऽ रहल अछि। एहि संदर्भमे राजद आब अति पिछड़ल वोट बैंककेँ मजबूत करबाक लेल आरक्षण रोकबाक मुद्दा उठयबाक
कोशिश कऽ रहल अछि।

जनतब अछि जे बिहारमे कयल गेल जाति आधारित जनगणनाक अनुसार ३६% अति पिछड़ल समुदाय विद्यमान अछि आ जँ ई समुदाय एकटा दलक अधीन एकजुट होइत अछि तँ ई निश्चित अछि जे सरकार बनत। एहन परिदृश्यमे कोनो दल अति पिछड़ल आ कर्पूरी ठाकुरक समर्थन लेबामे संकोच नहि करत। आब जखनि तेजस्वी यादव अपन प्रयास तेज कयलनि अछि, तखनि आन दल सेहो निश्चित रूपसँ कर्पूरी ठाकुरक अनुनायीक समर्थनसँ चुनावी नैयाकेँ पार करबाक प्रयास करत।