भरवाड़ामे अवैध रूपसँ संचालित अल्ट्रासाउंड सेंटर पर छापामारी

बेनीपुर समदिया
*

सिविल सर्जन डाॅ० अरुण कुमारक नेतृत्वमे नगर पंचायत भरवाड़ामे अवैध रूपसँ संचालित अल्ट्रासाउंड सेंटर पर छापामारी कयल गेल। छापामारी टीम केर अयबाक जानकारी भेटतहि बाजारमे हड़कंप मचि गेलै। अल्ट्रासाउंड सेंटरक संचालक कमरामे ताला लगा देलक।

मौका पर मौजूद महिला मरीज चुनचुन देवीसँ सीएस जानकारी लेलन्हि। महिला बतेलनि जे हुनकर अल्ट्रासाउंड ललित साह केलकन्हि अछि । बिना डॉक्टरक अल्ट्रासाउंड सेंटर केर संचालन अवैध रूपसँ भऽ रहल अछि । महिला मरीजकेँ देल गेल जांच रिपोर्ट पर अंकित मोबाइल नंबर पर सीएचसी केर एमओआईसी डॉ० प्रेमचंद प्रसादकेँ कॉल कयल गेल, मुदा डॉक्टरसँ बात नहि भऽ सकलन्हि । सिविल सर्जन एमओआईसी केर सेंटरकें सील कय प्राथमिकी दर्ज करेबाक निर्देश देल गेल। सिविल सर्जनक छापामारीक दौरान भरवाड़ा आ आसपासक अवैध जांच घर आ क्लिनिक संचालक सभमे हड़कंप मचि गेल अछि।

सिविल सर्जन घोड़दौड़ एपीएचसी केर निरीक्षण कऽ आयुष्मान कार्ड बनेबाक प्रगति केर समीक्षा कयलन्हि । बतायल गेल अछि जे पूरा जिलामे सिंहवाड़ा आयुष्मान बनेबामें अव्वल अछि । आयुष्मान कार्ड बनेबाक गतिकेँ सीएस संतोषप्रद मानलन्हि । ओतहि सीएचसी निरीक्षणक दौरान सीएस दवा भंडार , लेबर रूम , इमरजेंसी , ओपीडी आदि केर जायजा लेलन्हि । एहि केर संगहि ओ एमओआईसी , डॉक्टर आ चिकित्सा कर्मी सभकें परिसर केर साफ सफाई पर ध्यान देबाक बात सेहो कहलनि ।