आरएसएस प्रमुख मोहन भागवत आ केन्द्रीय गृह मंत्री अमित शाह कांग्रेस नेता राहुल गाँधीक जातिगत आरक्षण पर देल गेल बयान पर पलटवार कयलनि अछि। ओ कहलनि “राहुल लोककेँ गुमराह करबाक कोशिश कए रहल छथि।
जनतब जे राहुल गांधी शनिदिन कहने छलाह, “भाजपा नेता आ नरेन्द्र मोदीक निकट लोकक बयानसँ आब ई स्पष्ट भऽ गेल अछि जे हुनकर उद्देश्य संविधान बदलि कऽ देशक लोकतंत्रकेँ नष्ट करब आ दलित, पिछड़ा, आदिवासीक आरक्षण छीनि कऽ देश चलाबयमे हुनकर भागीदारी समाप्त करब अछि। मुदा संविधान आ आरक्षणक रक्षाक लेल कांग्रेस चट्टान जकाँ भाजपाक राह पर ठाढ़ अछि। जाबत कांग्रेस अछि, दुनियाक कोनो शक्ति वंचितसँ हुनकर आरक्षण नहिं छीनि सकैत अछि।”
अमित शाह जवाब दैत कहलनि, “राहुल गांधी निराधार झूठ बाजि जनताकेँ गुमराह करय केर कोशिश कऽ रहल छथि। एहि देशमे भाजपाक सरकार १० सालसँ चलि रहल अछि आ दू बेर पूर्ण बहुमत प्राप्त कऽ चुकल अछि। जँ भाजपाक मंशा आरक्षण खतम करबाक रहैत तऽ एखन धरि भऽ गेल रहैत। नरेन्द्र मोदी पूरा देशक दलित, पिछड़ा आ आदिवासी भाई-बहिनकेँ गारंटी देलनि अछि जे जाबत भाजपा अछि, आरक्षणकेँ कियो नहिं छू सकैत अछि।
आगू अमित शाह कहलनि “कांग्रेस पार्टी हरदम एससी/एसटी आ ओबीसी केर आरक्षण पर हमला कयलक अछि। कर्नाटकमे हुनक सरकार आबि चारि प्रतिशत अल्पसंख्यक आरक्षण बनौलक, ककर कोटा काटल गेल ? ओबीसीमे (आरक्षण) कटौती कयल गेल। आन्ध्र प्रदेशमे जखन ओ सत्तामे आयल तखन ओ पाँच प्रतिशत अल्पसंख्यक आरक्षण देलनि। ककर कोटा काटल गेल छल ? ओबीसी केर कोटा (आरक्षण) काटल गेल। कांग्रेस हरदम पिछड़ल समाजक विरोध कयलक आ आदिवासीकेँ न्याय देबाक लेल कहियो काज नहिं कयलक।”
राष्ट्रीय स्वयंसेवक संघ (आरएसएस) प्रमुख मोहन भागवत रविदिन कहलनि जे संघ परिवार कहियो किछु समूहकेँ देल गेल आरक्षणक विरोध नहिं कयलक। संघ आरम्भसँ संविधानक अनुसार सभ आरक्षणक समर्थन करैत आबि रहल अछि। मुदा किछु लोक फेक वीडियो वायरल कए रहल छथि।
एकटा शैक्षणिक संस्थानक कार्यक्रममे भागवत कहलनि, “एकटा वीडियो वायरल भऽ रहल अछि, जे पूर्णतः गलत अछि। संघक मानब अछि जे जतेक दिन धरि जरूरत अछि तहिया धरि आरक्षण देल जेबाक चाही।”
भागवत पछिला साल नागपुरमे कहने छलाह जे जाबत धरि समाजमे भेदभाव होयत ताबत आरक्षण जारी रहबाक चाही। ओ कहने छलाह जे समाजमे भेदभाव विद्यमान अछि, भले ओ अदृश्य होय।
