बिहार सरकारक मंत्री विजय कुमार चौधरी कहलनि अछि जे राहुल गाँधीमे अपन बयानसँ अपनाकेँ हास्यास्पद बनयबाक उल्लेखनीय प्रतिभा अछि।जातिगत जनगणनाकेँ नकली कहि ओ एकटा तुच्छ नेताक रूपमे अपन छवि कायम रखलनि अछि।
कांग्रेस नेता राहुल गांधी शनिदिन पटना पहुँचलाह, जतय ओ बिहारमे कयल गेल जातिगत जनगणनाकेँ फर्जी बतौलनि। एकर जवाबमे बिहारक संसदीय कार्य मंत्री विजय कुमार चौधरी तीक्षण प्रतिक्रिया देलनि अछि। मंत्री विजय चौधरी कहलनि जे राहुल गाँधी अपन बयानसँ अपनाकेँ उपहासक विषय बनयबाक उल्लेखनीय कलामे कुशल छथि। बिहारमे जातिगत जनगणनाक संबंधमे हुनक नवीनतम बयान एकर पुष्टि करैत अछि।
मंत्री विजय चौधरी कहलनि जे कांग्रेस पार्टी जातिगत जनगणनाक आरम्भसँ लऽ कऽ आँकड़ा जारी करबा धरि समर्थन कयने छल। एम्हर राहुल गांधी आब एहि जनगणनाकेँ फर्जी कहि रहल छथि। जँ राहुल गाँधीकेँ जनगणनामे कोनो गलती वा विसंगतिक जानकारी छल, तखनि बिहार सरकारक समक्ष किएक नहि उठाओल गेल ?
विजय चौधरी इहो स्पष्ट कयलनि जे बिहार सरकार तखनेसँ स्पष्ट रूपसँ कहलक अछि जे जँ जाति जनगणनाक आंकड़ामे कोनो विसंगति वा त्रुटि उत्पन्न होइत अछि तँ सरकार तत्काल जाँच करबाक लेल तैयार अछि, मुदा एखनि धरि कियो एहेन सूचना वा आपत्ति नहि देलक अछि।
राहुल गाँधीक बयान पर टिप्पणी करैत विजय चौधरी कहलनि, ‘जँ राहुल गाँधी बिना कोनो साक्ष्यक एहि गणनाकेँ फर्जी कहैत छथि तखनि ओ मात्र एकटा अगंभीर नेताक रूपमे अपन छवि कायम रखलनि अछि। हम ओहि लोकसँ बेसी अपेक्षा नहि करैत छी जे ‘भारतीय राज्य’ आ ‘भारत सरकार’क बीचक अन्तरकेँ नहि बुझैत छथि।
एहि पर केंद्रीय मंत्री राजीव रंजन (ललन) सिंह सेहो पलटवार कयलनि। ओ कहलनि जे, “हुनका (राहुल गाँधी) सब किछु फर्जी बुझाइत अछि, जखन कि ओ स्वयं पूरा फर्जीवाड़ाक सरदार छथि। बिहार जे जाति आधारित सर्वे करौलक ताहि आधार पर ओ जातिगत जनगणनाक माँग कऽ रहल छलाह, आ ओ नाटक करैत रहैत छथि।”
ओ कहलनि, “ओ संविधानक बात करैत छथि, मुदा हुनका एहि बातक कोनो जानकारी नहि अछि जे संविधानमे कतेक अनुसूची आ कतेक अनुच्छेद अछि।”
