लोकसभामे विपक्षक नेता राहुल गांधी बृहस्पतिकेँ पत्रकार सम्मेलन कए निर्वाचन आयोग पर गंभीर आरोप लगौलनि। ओ कहलनि जे, आयोग भारतीय जनता पार्टीक संग मिलिकय चुनावमे धांधली कय लोकतंत्रकेँ कमजोर कय रहल अछि।
राहुल गांधी कहलनि जे हमर संविधानक आधार ‘एक व्यक्ति, एक मत’ केर सिद्धांत पर टिकल अछि। एहि लेल जखनि चुनाव होइत अछि तँ सभसँ जरूरी सवाल अछि जे सही लोककेँ वोट देबय केर अनुमति देल जा रहल अछि कि नहि ? मतदाता सूचीमे फर्जी नाम जोड़ल जा रहल अछि की ? मतदाता सूची सही अछि की ?
ओ कहलनि जे किछु समयसँ जनतामे शंका बढ़ि रहल अछि। ओ पांचटा मुख्य बिंदुकेँ सूचीबद्ध करैत कहलनि जे भाजपाकेँ कहियो सत्ता विरोधीक सामना नहि करय पड़ैत अछि। भाजपा केर अप्रत्याशित आ पैघ जीत भेटैत अछि। ओपिनियन पोल आ एग्जिट पोल बेर-बेर गलत साबित होइत अछि। मीडिया द्वारा बनाओल गेल माहौल आओर चुनावी कार्यक्रमकेँ जानबूझि कय ‘कोरियोग्राफिंग’ सेहो एहि पांच बिन्दुमे शामिल अछि।
राहुल गांधी कहलनि जे, महाराष्ट्र आ हरियाणा विधानसभा चुनावमे हुनका एहि शंकाक पाछुक असली तस्वीर देखय लेल भेंटय लागल। ओ कहलनि जे महाराष्ट्रमे मात्र 5 मासमे नव मतदाताक संख्या पिछला 5 सालमे जोडल गेल संख्यासँ बेसी अछि। बहुतो इलाकामे ओहि इलाकाक पूरा आबादीसँ बेसी मतदाताक संख्या जोडल गेल। 5 बजेक बाद अचानक मतदानमे उछाल आयल, मुदा मतदान केंद्र पर कतार नहि लागल।
विपक्षक नेता इहो आरोप लगौलनि जे चुनाव आयोग मशीन-रीडेबल वोटर लिस्ट देबयसँ इनकार कय देलक। जँ अगर हमरा सब लग सॉफ्ट कॉपी रहैत तँ हम 30 सेकेंडमे पूरा डाटाक विश्लेषण कय सकैत छलहुं। मुदा हमरा सभकेँ सात फुट नमहर कागजक गठरी भेटल, जकरा पढ़बा आ मिलान करबामे छह मास लागि गेल। मात्र एकटा विधानसभा सीट लेल 30-40 लोकक टीम दिन-राति काज कयलक।
विपक्ष नेता कहलनि, कर्नाटकक महादेवपुरा विधानसभा सीट पर 1,00,250 वोटमे धांधली भेल। ओ पांच तरहक गड़बड़ीक जिक्र कयलनि, जाहिमे डुप्लीकेट मतदाता, फर्जी आ अमान्य पता, एक पता पर बेसी मतदाता, अमान्य फोटो आ फॉर्म 6 केर दुरुपयोग शामिल अछि।
राहुल गांधी कहलनि जे, जनताकेँ पारदर्शिताक पूर्ण अधिकार अछि आ चुनावसँ जुड़ल कोनो रिकॉर्डकेँ नष्ट नहि करबाक चाही। कांग्रेस टीम पूरा सिस्टमकेँ बुझि गेल अछि आओर सच्चाई जनताक सामने लाओत।
