बिहारमे कांग्रेसक नव रणनीतिमे स्वयं राहुल गांधीक सक्रियता देखल जा रहल अछि। चारि महिनाक भीतर तेसर बिहार दौरा पर आबि रहल राहुल गांधी दलित आ अति पिछड़ा वर्ग पर फोकस क’ रहल छथि।
जिलाध्यक्ष सभक दिल्लीमे भेल बैठक आ संगठन मजबूती पर जोर एहि रणनीतिक हिस्सा छी। कांग्रेसक लक्ष्य 2025 केर चुनाव लेल संगठनकेँ मजबूत करब आ सामाजिक समीकरण सभक लाभ उठायब अछि।
बिहारमे कांग्रेस पार्टीमे नव ऊर्जा भरल जा रहल अछि। पार्टी दिसिसँ प्रतिदिन कोनो ने कोनो निर्णय लेल जा रहल अछि। आ ई निर्णय सभ सुर्खी बनि रहल अछि। एहिमे राहुल गांधी स्वयं विशेष सक्रियता देखा रहल छथि। कांग्रेस अपन पुरान जमीन तलाशय केर पुरजोर प्रयास कऽ रहल अछि।
एहेनमे बिहारक राजनीतिमे ई सवाल उठि रहल अछि जे आखिर राहुल गांधीक मनमे की चलि रहल अछि ? की राहुल गांधी बिहारमे किछु अलग करबाक सोचि रहल छथि ?
वास्तवमे राहुल गांधी आगामी सात अप्रैलकेँ बिहारक दौरा पर आबि रहल छथि। पाछुक चारि मासक भीतर ई तेसर अवसर होयत, जे राहुल गांधी बिहारक दौरा पर अओताह। एहिसँ पहिने ओ 18 जनवरी आ 04 फरवरीकेँ पटनामे आबि चुकल छथि।
एहि बेर राहुल गांधी सात अप्रैलकेँ फेर पटना आबि रहल छथि। राहुलक एहि बेरक पटना दौराक सेहो पार्टीक तरफसँ संविधान सुरक्षा दिवसक नाम देल गेल अछि। वास्तवमे हालक किछ सालमे ई पहिल मौका अछि, जखनि राहुल गांधी पार्टीक जिला अध्यक्ष सभसँ दिल्लीमे भेंट करबाक योजना बनौलनि। राहुल गांधीक एहि डेगसँ पार्टीक अंदर काफी जोश सेहो आयल अछि। सभसँ महत्वपूर्ण ई अछि जे कांग्रेस पार्टीक तरफसँ राज्यक सभ जिलाध्यक्षक नामक घोषणा चंद दिन पहिने क’ देल गेल छल।
वास्तवमे पूर्व केंद्रीय मंत्री अखिलेश प्रसाद सिंहक बिहार कांग्रेसक अध्यक्ष रहैत प्रदेशमे कोनो प्रकारक समितिक गठन नहि भ’ सकल छल। विधायक राजेश कुमारक नब प्रदेश अध्यक्षक रूपमे पद ग्रहणक बाद जिलाक अध्यक्ष सभक’ सेहो नियुक्ति क’ देल गेल। एकर अलावा स्क्रीनिंग समितिक गठन कएल गेल।
राहुल गांधी केर आगामी प्रस्तावित बिहार दौरामे जाहि बिंदु सभ केंद्रमे रिखल गेल अछि, ताहिसँ ई साफ जाहिर भ’ रहल अछि कि राहुल गांधी आ कांग्रेस पार्टी केर नजरि बिहारमे दलित, महादलित आ अति पिछड़ा पर अछि। कांग्रेस पार्टी महादलित वोटर सभकेँ अपन तरफ आकर्षित कए जीतन राम मांझी, चिराग पासवान आ पशुपति पारसकेँ संदेश देब’ चाहैत छथि, जखनकि अति पिछड़ा पर ध्यान केंद्रित कए सेहो सीएम नीतीश कुमारकेँ संदेश देबाक प्रयास क’ रहल छथि।
एकटा आंकलनक अनुसार बिहारमे दलित आ महादलितक आबादी लगभग 14 प्रतिशतक करीब अछि। ओतहि अति पिछड़ा हालहिमे बिहार सरकार द्वारा कराएल जातीय सर्वेक अनुसार राज्यमे 36 प्रतिशत अछि।
कांग्रेसक प्रवक्ता ज्ञान रंजन कहैत छथि कि कांग्रेस कार्यकारी समिति एकटा फैसला लेने छल कि 2025 मे कांग्रेस संगठन सृजनक काज करब। एहि फैसला केर तहत देशक हर राज्यक जिला अध्यक्ष संग मीटिंग भ’ रहल अछि। एहि सिलसिलामे बिहारक जिला अध्यक्ष सभ संग राहुल गांधी, राष्ट्रीय अध्यक्ष मल्लिकार्जुन खरगे आ कांग्रेस पार्टी केर अन्य वरिष्ठ नेता सभ संग बैठक होयत, जतय ई बात कएल जायत जे संगठन केना मजबूत करबाक अछि ? केना बूथ स्तर धरि संगठन केर लऽ जाओल जाए आ कोन तरिकासँ सामाजिक समीकरण सभ, स्थानीय मुद्दासभ केर देखैत ओहि मुद्दा पर काज कए संगठन केर मजबूत बनाओल जाय।
