असमक लेल ११ क्षेत्र पर फोकस दैत राहुल गांधी जारी कयलनि कांग्रेसक घोषणा-पत्र
नई दिल्ली । समदिया
कांग्रेस नेता राहुल गांधी बृहस्पतिकेँ असम विधानसभा चुनावक लेल पार्टीक घोषणा-पत्र जारी कयलथि। एहि घोषणा-पत्रमे शासन, पहिचान आ स्वास्थ्य जेकाँ 11 क्षेत्र पर ध्यान देल गेल अछि। ई घोषणा-पत्र एकटा चुनावी रैलीक दौरान जारी भेल, जतय राहुल गांधीक संग असम कांग्रेस अध्यक्ष गौरव गोगोई आ अन्य वरिष्ठ नेता उपस्थित छलथि। घोषणा-पत्रमे कुल 11 संकल्प शामिल अछि — शासन, पहिचान, स्वास्थ्य, बुनियादी ढांचा विकास, औद्योगीकरण, कृषि, ग्रामीण आ शहरी विकास, जलवायु परिवर्तन आ सुरक्षा असम। कांग्रेस एहिसँ पहिने 29 मार्चकेँ पार्टी अध्यक्ष मल्लिकार्जुन खरगेक दौराक दौरान ‘पाँच गारंटी’ सेहो जारी कयने छल – बिना शर्त महिला सभक लेल 50 हजार रुपैया धरि कर्ज। सभ वरिष्ठ नागरिकक लेल 1250 रुपैया पेंशन।25 लाख रुपैयाक कैशलेस इलाज।भूमि पुत्रक लेल म्यादी पट्टा। जुबीन गर्ग मामिलामे 100 दिनक भीतर दोषीकेँ सजा। 126 सदस्यीय असम विधानसभाक लेल मतदान 9 अप्रैलकेँ होयत, जखनिकि एकर परिणाम 4 मईकेँ घोषित कएल जाएत। कांग्रेस नेता राहुल गांधी कहला, असम फूलक एकटा गुलदस्ता छै, जतय अलग-अलग धर्म, जाति आ विचारधाराक लोक रहैत छथि। कांग्रेसक सोच अछि- भारतक जनताक हाथमे असली ताकत होए, देश केर चलाबयमे प्रत्येक वर्गकेँ भागीदारी भेटय। दोसर दिसि भाजपाक विचारधारा अछि कि असमकेँ दिल्लीसँ चलाओल जाए – इएह लड़ाई चलि रहल अछि। ओ कहला, कांग्रेस पार्टी 244 (ए) लेल आयल छल, कारण हमर सोच अछि कि असम केर नहिं गुवाहाटीसँ चलाओल जाए आ नहि दिल्लीसँ। 244 (ए) सँ असमक जनताकेँ ताकति भेटैत अछि आ ई हुनका निर्णय लेबाक शक्ति देत अछि। कांग्रेस आ भाजपामे इएह अंतर अछि। कांग्रेस नेता कहला, (प्रधानमंत्री नरेन्द्र मोदी) केँ (अमेरिकी राष्ट्रपति डोनाल्ड) ट्रंप नियंत्रित करैत छथि। ट्रंप खुल्ला नरेन्द्र मोदी के अपशब्द कहैत छथि। ओ कहैत छथि- नरेन्द्र हमरा सर कहैत छथि। हम हुनकर करियर कखनो खत्म क’ सकैत छी। सच्चाई ई अछि जे (उद्योगपति गौतम) अदाणी आ (यौन अपराधी जेफरी) एपस्टीन, ट्रंप एहि दुनू हथियारसँ नरेंद्र मोदीकेँ पकड़ने छथि आ मोदी किछुओ नहि कऽ सकैत छथि। ट्रंप लग मोदीक भ्रष्टाचार आ अदाणीक कंपनिक पूरा जानकारी अछि। अदाणी पर अमेरिकामे आपराधिक मुकदमा चलि रहल अछि। जँ अदाणी अमेरिका जाइत छथि, तऽ हुनका जेलमे बन्द कऽ देल जाएत आ नरेंद्र मोदीक गुब्बारा ओतहि फूटि जाओत। राहुल गांधी आरोप लगबैत कहलाह, असमक मुख्यमंत्री हिन्दुस्तानक सबसँ भ्रष्ट मुख्यमंत्री छथि। हुनकर नियन्त्रण नरेंद्र मोदी आ शाहक हाथमे अछि। जँ नरेंद्र मोदी हुनका कहथिन जे कुदू तँ ई कुदताह। जँ नरेंद्र मोदी हुनका कहथिन जे अमित शाहक पएर पकड़ू, तँ ई हुनक पएर पकड़त। ई सच्चाई अछि। डोनाल्ड ट्रंप नरेंद्र मोदीकेँ नियंत्रित करैत छथि आ नरेंद्र मोदी अपन मुख्यमंत्रीकेँ नियंत्रित करैत छथि। ओ आगू कहलाह, हिमंत बिस्व सरमा देशक सभसँ भ्रष्ट मुख्यमंत्री छथि। हिमंता, सिंडिकेट केर संगे मिलि कऽ असम चला रहल छथि। जखनहि प्रदेशमे कांग्रेसक सरकार आएत, हिमंता हाथ जोड़ी कऽ ठाढ़ भऽ जेताह। हिमंता बिस्व सरमाकेँ सभ भ्रष्टाचारक सजा भेटत। हिमंता जानि रहल छथि जे कांग्रेस पार्टी हुनका छोड़यवाला नहि अछि। जाहि दिन भाजपाक सरकार जाएत, ओहि दिन मात्र दू मिनटमे हुनकर घमंड टूटि जाएत। एहेन डरपोक लोकसँ डरय केर कोनो जरूरत नहि अछि।
