बृहस्पतिकेँ राहुल गाँधी दिल्लीक जीटीबी नगरमे दिहाड़ी मजदूर ओ श्रमिक सभसँ भेंट कयलनि, पुनः शुक्रदिन ओ हाथरस हादसाक पीड़ित परिवारसँ भेंट करय पहुँचलाह। एहि तरहेँ राहुल गाँधी आब अलग तेवरमे देखल जा रहल छथि आ संसदसँ सड़क धरि राजनीतिक संदेश देबाक प्रयास कऽ रहल छथि।
कांग्रेस भले देशमे सत्तामे वापस नहिं आबि सकल होय, मुदा लोकसभामे ९९ सीट जीतलाक बाद मनोबल ऊँच अछि। राहुल गाँधी, जे पहिल बेर प्रतिपक्षक नेताक पदक जिम्मेदारी सम्हारि रहल छथि, संसदसँ सड़क धरि सक्रिय देखल जा रहल छथि। लोकसभामे राहुल मोदी सरकारक विरुद्ध आक्रामक तेवर देखौलनि, नफरतक मुद्दासँ लऽ कऽ अग्निवीर धरि, फेर संसदक विशेष सत्र समाप्त होइत सड़क पर उतरि गेलाह।
लोकसभा चुनावमे भेटल जीतसँ कांग्रेसकेँ राजनीतिक संजीवनी भेटल अछि। राहुल गाँधी आब २०२४क चुनावसँ बनल माहौल बनाकऽ रखबाक कोनो अवसर नहिं छोड़य चाहैत छथि। संसदसँ गली तक सक्रिय रहि राहुल भाजपा आ मोदी सरकारक खिलाफ मोर्चा खोलल राखय चाहैत छथि। जाहि तरहें मोदी सरकार संसदमे आक्रामक रूपसँ घेरल गेल आ ओकर बाद सड़क पर निकलि कए फेरसँ जनतासँ भेंट करबाक प्रक्रिया शुरू कऽ देलक अछि।
२०२४क लोकसभा चुनावक बादसँ राहुल गाँधीक बदलल शैलीक चर्चा चलि रहल अछि।
कांग्रेस सांसद राहुल गांधी शुक्रदिन हाथरस दुर्घटनाक पीड़ितक परिवारसँ भेँट कयलनि। सबसँ पहिने अलीगढ़मे पीड़ित परिवारसँ भेंट कयलथि आ हुनक दुःख बुझलथि आ फेर हाथरसमे पीड़ित परिवारसँ भेंट कयलथि। राहुल गाँधी कहलनि जे दुखक बात अछि जे कतेको परिवारकेँ नोकसान भेल अछि। हम एकरा राजनीतिक चश्मासँ नहि देखय चाहैत छी, मुदा शासनक कमी अछि आ गलती भेल अछि।
राहुल उत्तर प्रदेशक मुख्यमंत्री योगी आदित्यनाथसँ पीड़ित परिवारकेँ जल्दीसँ जल्दी मुआवजा देबाक मांग कयलनि अछि। राहुल कहलनि जे मुआवजा सही भेटबाक चाही। ओ कहलनि “हम मुख्यमंत्रीसँ आग्रह करैत छी जे उदारतापूर्वक मुआवजा दियौ आ जल्दीसँ जल्दी दियौक, किएक तँ ई गरीब परिवार अछि आ ई हुनका लेल कठिन समय अछि।”
लोकसभामे प्रतिपक्षक नेताक पद सम्हारलाक बादसँ राहुल गाँधी आक्रामक रहल छथि। लोकसभामे राष्ट्रपतिक अभिभाषण पर चर्चाक क्रममे राहुल गाँधी मोदी सरकारपर भयंकर हमला कयलनि। अपन पहिल भाषणमे राहुल गाँधी भगवान शिव आ अभय मुद्राक आधारपर हिन्दुत्वक मुद्दाकेँ घेरैत देखल गेलाह। ओ अग्निवीर, किसान, मणिपुर, नीट, बेरोजगारी, नोटबंदी, जीएसटी, एमएसपी, हिंसा आ घृणा पर हमला कयलनि। ओ अपन ९० मिनटक भाषणक शुरुआत संविधानक प्रति देखाकऽ कयलनि आ भाजपापर भय देखयबाक आ हिंसा फैलयबाक आरोप लगओलनि।
राहुल गांधी कहलनि भाजपा भय फैला रहल अछि। राहुल कहलनि जे मोदी सरकार उद्योगपतिक १६ लाख करोड़क कर्ज माफ कयलक मुदा किसानक कर्ज माफ नहिं कयलक। एकर बाद अग्निवीरक मुद्दा उठबैत कहलथि जे पूरा देश जनैत अछि जे ई सेनाक योजना अछि। सेना जनैत अछि जे ई योजना सेनाक नहि अपितु प्रधानमन्त्रीक मस्तिष्कक उपज अछि। राहुल कहलनि जे जँ हमर सरकार आबि जायत तऽ हम अग्निवीर योजना केर खत्म करब। राहुलक भाषणक दौरान मोदी सरकारक कतेको महत्वपूर्ण मंत्री बीचमे ठाढ़ भेलथि। एहि तरहेँ राहुल गाँधी आक्रामक रवैया देखबैत अपन शैली देखौलनि अछि जे ओ सदनमे मोदी सरकारकेँ घेरबाक कोनो मौका नहिं छोड़ताह।
