कांग्रेस सांसद राहुल गांधी बिहारमे कानून व्यवस्थाक स्थितिकेँ लऽ कऽ भाजपा आ राज्यक मुख्यमंत्री नीतीश कुमारकेँ निशाना बनेलनि अछि। गोपाल खेमका हत्याकांड पर राहुल गांधी आरोप लगौलनि जे भाजपा आ नीतीश कुमार मिलिकय बिहारकेँ ‘भारतक क्राइम कैपिटल’ बना देलक अछि।
कांग्रेस सांसद राहुल गांधी सोशल मीडिया प्लेटफॉर्म एक्स पर एकटा पोस्टमे कहलनि जे, “पटनामे व्यवसायी गोपाल खेमकाकेँ सरेआम गोली मारि हत्या एक बेर फेर साबित कय देलक अछि जे भाजपा आ नीतीश कुमार मिलिकय बिहारकेँ ‘भारतक अपराधक राजधानी’ बना देलनि अछि। आइ बिहार लूट, गोलीबारी आ हत्याक छायामे जीबि रहल अछि। एहि ठाम अपराध ‘न्यू नॉर्मल’ बनि गेल अछि – आ सरकार पूर्ण रूपसँ असफल भऽ गेल अछि।”
ओ आगू लिखलनि, “बिहारक भाइ-बहिन, ई अन्याय आब बर्दाश्त नहि कएल जा सकैत अछि। जे सरकार अहाँक बच्चा सभक रक्षा नहि कऽ सकैत अछि, ओ अहाँक भविष्यक जिम्मेदारी नहि ल’ सकैत अछि। हर हत्या, हर डकैती, हर गोली – परिवर्तनक पुकार अछि। आब समय अछि एकटा नव बिहारक – जतय कोनो डर नहि, बल्कि प्रगति होयत। एहि बेर वोट सिर्फ सरकार बदलबाक लेल नहि, बल्कि बिहारकेँ बचाबय लेल होएत।”
जनतब जे शुक्र दिन देर रातिमे अपराधी सुप्रसिद्ध उद्योगपति गोपाल खेमकाक हत्या कय देलक। गांधी मैदान थाना क्षेत्रक रामगुलाम चौकक समीप ई घटना भेल। पुलिस एहि मामिलामे आरोपीकेँ गिरफ्तार करबा लेल विशेष जांच दल (एसआईटी) केर गठन केलक अछि। एहि घटनासँ व्यवसायी नाराज छथि।
बिहारक डीजीपी विनय कुमार रविदिन दावा कयलनि जे अगिला एक-दू दिनमे एहि हत्याकांडक पूरा तस्वीर साफ भऽ जाएत। ओ कहलनि जे, राति भरि कतेको पुलिस टीम पटना आ वैशाली जिलामे अलग-अलग स्थान पर छापा मारि रहल छल। एहि दौरान दर्जन भरिसँ बेसी संदिग्धकेँ हिरासतमे लेल गेल अछि, फिलहाल पूछताछ भऽ रहल अछि। गोपाल खेमकाकेँ गोली मारय वाला हमलावरक मौके परहक टा नहि बल्कि शहरक अन्य भागमे लागल सीसीटीवी कैमरासँ सेहो पता लगाओल जा रहल अछि। हमलावरक मोटरसाइकिलक पहचान भऽ गेल अछि, मुदा हेलमेट पहिरने ओकर चेहराक साफ पहिचान नहि भऽ सकल अछि।
