केन्द्रीय मंत्री जीतन राम मांझी कांग्रेसक वरिष्ठ नेता आ सांसद राहुल गांधी पर कटाक्ष कयलनि अछि। ओ कहलनि कि आन देशमे अपन देशक बारेमे इ नहि कहय केर चाहैत छल। सभ गोटे अपन देशक प्रति ईमानदार छथि, कोनो देशभक्त एना नहिं कहि सकैत छथि। राहुल गाँधी अपन देशक नहिं अपितु विदेशक नेता छथि। इएह कारण अछि जे राहुल गाँधी विदेशमे जा कऽ भारतक बारेमे एहेन बात करैत छथि। कोनो भारतीय एना नहिं बाजि सकैत अछि, राहुल गाँधीकेँ सेहो एना नहिं बजबाक चाही। ओ विपक्षक नेता छथि। हुनका संसदमे बजबाक चाही। राहुल गांधी ‘घर का भेदी लंका ढ़ाए’ वाला काज कए रहल छथि।
वास्तवमे पछिला सप्ताह राहुलक अमेरिका यात्राक क्रममे हुनक बयानकेँ लऽ कऽ भयंकर हंगामा भेल अछि। जातिगत जनगणनासँ लऽ कऽ आरक्षण धरिक मुद्दा पर विवाद भेल। भारत विरोधी अमेरिकी सांसद इल्हान उमरक सङ्ग हुनक भेँट सबसँ अधिक विवादास्पद छल। राहुल गाँधी कहने छलाह जे “जखन भारत एकटा निष्पक्ष स्थान बनि जायत तखन कांग्रेस आरक्षण समाप्त करबा पर विचार करत। राहुल गाँधी कहलनि जे भारत एखनि निष्पक्ष स्थान नहिं अछि। भारतमे ९० प्रतिशत जनसंख्यामे दलित, ओबीसी आ आदिवासीक अछि जे खेलमे शामिले नहिं अछि।”
केन्द्रीय मंत्री जीतन राम माँझी वन्दे भारत एक्सप्रेसक परिचालनक लेल प्रधानमंत्री नरेन्द्र मोदीकेँ धन्यवाद देलनि अछि। ओ जनओलनि जे विष्णुपद गलियारा, महाबोधि गलियारा, भुवनेश्वरसँ कोलकाता एक्सप्रेसवे, औद्योगिक पार्कक निर्माण कयल जा रहल अछि। एहेनमे वंदे भारत एक्सप्रेस ट्रेनक उपयोगिता आओर बढ़ि जायत।
रेल मंत्रालय गयाक लोकक लेल दूटा आओर वन्दे भारत ट्रेनक उपहार देलक अछि। वन्दे भारत एक्सप्रेस पहिल बेर गया जंक्शनसँ शुरू कयल गेल छल। प्रधानमंत्री नरेन्द्र मोदी रविदिन वीडियो कॉन्फ्रेंसिंगक माध्यमसँ गया-हावड़ा वंदे भारत आ वाराणसी-देवघर वंदे भारतक झंडा देखा कय रवाना कयलनि। एहि अवसर पर गया रेलवे स्टेशनक प्लेटफार्म नम्बर ६ पर एकटा कार्यक्रमक आयोजन कयल गेल। केन्द्रीय मंत्री जीतन राम मांझी, पर्यावरण मंत्री डॉ. प्रेम कुमार आ रेलवे अधिकारी सहित कतेको नेता एहि कार्यक्रममे शामिल भेलाह। एकर अतिरिक्त गया जंक्शन पटना रांची वंदे भारत आ रांची-वाराणसी वंदे भारतक परिचालन पहिनेसँ भऽ रहल अछि, ओतहि पटना-टाटा वंदे भारतक शुभारंभ सेहो रवि कऽ कयल गेल अछि। दू टा आर वंदे भारतक संग आब गया रेलवे स्टेशनसँ पाँचटा वंदे भारत ट्रेनक परिचालन होयत।
