विनेश फोगाटक पुरस्कार वापसी पर राहुल गाँधी कयलनि पीड़ा व्यक्त

प्रधानमंत्रीक एहेन निष्ठुरता देखि पीड़ा होइत अछि – राहुल

*

नई दिल्ली

*

विनेश फोगाट द्वारा खेल रत्न आ अर्जुन पुरस्कार वापिस कयलाक बाद राहुल गाँधी पीएम मोदीक आलोचना कयलनि अछि। प्रधानमंत्री कार्यालय जयबासँ रोकलाक बाद विनेश कर्तव्य पथ पर अपन पुरस्कार छोड़ि देने छलीह। राहुल प्रधानमंत्रीपर निशाना साधैत कहलनि जे प्रधानमंत्रीक एहि निर्दयता देखि ओ दुखी छथि।

कांग्रेस नेता राहुल गांधी राष्ट्रीय राजधानीक कर्तव्य पथ पर महिला पहलवान विनेश फोगाटक खेल रत्न आ अर्जुन पुरस्कार छोड़य के लेल प्रधानमंत्री नरेंद्र मोदी पर रवि कऽ आक्रमण कयलनि। गाँधी कहलनि जे प्रधानमंत्री देशक अभिवावक होईत छथि आ हुनकासँ “एहन निष्ठुरता” देखि दुःख होइत अछि। गाँधीक ई बयान, कतेको बेर विश्व चैम्पियनशिप पदक विजेता विनेश फोगाट द्वारा अपन खेल रत्न आ अर्जुन पुरस्कार वापिस करबाक एक दिन बाद आयल अछि आ दिल्ली पुलिस द्वारा हुनका प्रधानमन्त्री कार्यालयमे जयबासँ रोकलाक बाद फोगाट जखनि दुनू पुरस्कार कर्तव्य पथक बीचमे छोड़ि देलनि।

विनेश ओलम्पिक पदक विजेता साक्षी मलिक आ बजरंग पूनियाक सङ्ग भारतीय कुश्ती महासंघ (डब्ल्यूएफआई)क पूर्व अध्यक्ष बृजभूषण शरण सिंहक निकट सहयोगी संजय सिंहक चुनावक विरोध कयने छलीह। तीनू गोटे बृज भूषण पर यौन उत्पीड़नक आरोप लगओने छलीह। कर्तव्य पथ पर फोगाटक एकटा वीडियो साझा करैत राहुल सोशल मीडिया प्लेटफॉर्म ‘एक्स’ पर एकटा पोस्टमे कहलनि जे “देशक प्रत्येक बेटीक लेल स्वाभिमान सबसँ पहिने अबैत अछि, ओकर बाद कोनो आन पदक या सम्मान। आइ की ‘एकटा घोषित बाहुबली’ सँ भेटयवाला ‘राजनीतिक लाभ’क दाम, एहि बहादुर बेटीसभक नोरसँ बेसी भऽ गेल अछि ? प्रधानमंत्री राष्ट्रक अभिवावक होईत छथि, हुनक एहन निष्ठुरता देखि पीड़ा होईत अछि।”

फोगाट मंगलदिन अपन खेल रत्न आ अर्जुन पुरस्कार सरकारकेँ वापिस करबाक निर्णय लेने छलीह। ओ कहने छलीह जे एहन सम्मान एहन समयमे अर्थहीन भऽ गेल अछि जखन पहलवान न्याय पाबय लेल संघर्ष कऽ रहल छथि। ओ प्रधानमंत्री नरेन्द्र मोदीकेँ पत्र लिखि अपन निर्णयक घोषणा कयलनि। शनिदिन फोगाट अपन पुरस्कार वापिस करबाक लेल प्रधानमन्त्री कार्यालय पहुँचबाक प्रयास कयलनि मुदा पुलिस हुनका रोकि देलक। एकर विरोधमे विनेश फोगाट कर्तव्य पथ पर पुरस्कार छोड़ि देलनि, जकरा बादमे दिल्ली पुलिस एकरा उठा लेलक।

संजय सिंहकेँ डब्ल्यूएफआई प्रमुखक रूपमे नियुक्त कयलाक तुरन्त बाद साक्षी सेहो कुश्तीसँ संन्यासक घोषणा कयने छलीह। यद्यपि खेल मंत्रालय नव-निर्वाचित डब्ल्यूएफआई पैनलकेँ संविधानक प्रावधानक पालन नहिं करबाक लेल निलम्बित कऽ देलक आ भारतीय ओलंपिक संघ (आईओए)केँ खेल निकायक मामिलाक देखरेख लेल एकटा तदर्थ समितिक गठन करबाक लेल कहलक। खेल मंत्रालयक निर्देशपर कार्रवाई करैत आईओए बुधदिन डब्ल्यूएफआई चलाबय लेल तीन सदस्यीय तदर्थ समितिक गठन कयलक।