कांग्रेस नेता राहुल गांधी रायबरेलीमे प्रचार कऽ रहल छथि। सोमदिन जिलाक महाराजगंजमे एकटा जनसभाकेँ सम्बोधित करैत ओ कहलनि, “हमर दूटा माय अछि। एकटा छथि सोनिया गाँधी आ दोसर छथि इन्दिरा गाँधी जे हमर रक्षा कयलनि। हमरा सिखेलनि। रायबरेली हमर दुनू मायक कर्मभूमि अछि। एहि लेल हम एतय चुनाव लड़बा लेल आयल छी।
राहुल कहलनि कि रायबरेलीक संग हमर परिवारक संबंध १०० साल पुरान अछि। ई चुनाव इतिहासक पहिल चुनाव अछि जाहिमे कांग्रेस संविधानक रक्षाक लेल लड़ि रहल अछि। भाजपा आ आरएसएस संविधानक किताब फाड़ि देत, आ गरीबक लेल सभ रास्ता बंद भऽ जायत। प्रधानमंत्री आ भाजपा पर हमला करैत ओ कहलनि जे ओ अडानी आ अंबानीक सरकार बनाबय जा रहल छथि। एहि दुनू लोकक लेल मात्र संविधानक धज्जी उड़ायल जा रहल अछि।
प्रधानमंत्री नरेन्द्र मोदी पर निशाना साधैत राहुल गांधी कहलनि जे नरेन्द्र मोदी दस सालमे २२ अरबपतिकेँ १६ लाख करोड़ रुपया देलनि। ई पाइ ७० करोड़ लोकक आमदनी केर बराबर अछि। ई लड़ाई गरीबक रक्षाक लेल अछि। जँ सरकार बनत तऽ हर महिलाकेँ खातामे प्रति माह ८५०० टाका भेजल जाएत। प्रत्येक मासक पहिल तारीखकेँ खटाखट पाइ खातामे खसत।
राहुल कहलनि कि प्रधानमंत्री युवाकेँ बेरोजगार बना देलनि। जखन इंडिया गठबन्धन सरकार बनत तखन प्रत्येक युवाकेँ अप्रेंटिसशिप भेटत। एहि तरहेँ पहिल नोकरी पक्का। चाहे ओ सार्वजनिक क्षेत्र हो वा सरकारी विभाग, सरकार बनैत ठेकेदारी प्रथा बंद होएत।
एहि दौरान राहुल गाँधी आ प्रियंका गाँधी जनसभामे एक सङ्ग उपस्थित भेलाह। मंच पर दुनू गोटेकेँ एक संग देखि भीड़क उत्साह चरम पर दिखल। जनसभाक माध्यमसँ राहुल आ प्रियंका भाजपाकेँ ताकतक अनुभव करयलनि।
