राघव चड्ढाकेँ हटा पंजाबक सांसद डाॅ अशोक मित्तलकेँ आप राज्यसभाक उप नेता पद देलक

नई दिल्ली । समदिया

आम आदमी पार्टी (AAP) संगठनमे पैघ बदलाव करैत राज्यसभामे अपन उप नेताक पदसँ राघव चड्ढाकेँ हटा देलक। एहि संबंधमे पार्टी राज्यसभा सचिवालयकेँ आधिकारिक पत्र पठा कs जानकारी देलक। संगहि, पार्टी स्पष्ट कएलक अछि जे आब संसदमे राघव चड्ढाकेँ बाजय लेल समय नै देल जाए। हुनकर स्थान पर पंजाबसँ राज्यसभा सांसद डॉ. अशोक मित्तल नव उप नेता नियुक्त कएल गेल छथि। पिछला किछु समयसँ राघव चड्ढा आ पार्टी नेतृत्वक बीच मतभेदक खबरि आबि रहल छल। हालांकि, AAP कोनो तरहक विवाद वा अलगाव पर औपचारिक बयान नै दैत छल, मुदा एहि फैसला केर एहि अटकलसँ जोड़िके देखल जा रहल अछि। राज्यसभामे AAP केर कुल 10 सदस्य छथि, जाहिमे सs सात पंजाब आ तीन दिल्ली सs छथि। राघव चड्ढा पार्टीक शुरूआती दिनसँ जुडल रहला आ हुनकर राजनीतिक यात्रा 2012 मे अरविंद केजरीवालक संग शुरू भेल छल। पार्टीमे हुनकर भूमिका लगातार मजबूत होइत गेल। ओ राष्ट्रीय प्रवक्ता बनलाह आ 2015 मे दिल्लीमे AAP केर जीतक बाद सभसँ छोट उम्रक कोषाध्यक्ष सेहो बनलाह। हालांकि, 2019 केर लोकसभा चुनावमे हुनका दक्षिण दिल्ली सीटसँ हारिक सामना करऽ पड़ल, मुदा 2020 मे ओ राजेंद्र नगरसँ विधानसभा चुनाव जितिक वापसी कएलन्हि। साल 2022 मे ओ 33 वर्षक उम्रमे राज्यसभाक सभसँ युवा सांसद बनलाह आ पार्टीक संसदीय काजमे सक्रिय भूमिका निभबैत रहलाह। 2023 मे हुनका संजय सिंहक जगह राज्यसभामे पार्टीक नेता बनाओल गेल छल। आब नव बदलावक संग डॉ. अशोक मित्तलकेँ ई जिम्मेदारी सौंपल गेल अछि, जे आगू पार्टीक संसदीय रणनीतिक दिशा देताह।