फ्रान्सक एयरोस्पेस कंपनी डसॉ एविएशन आ टाटा एडवांस्ड सिस्टम्स लिमिटेड बृहस्पतिकेँ भारतमे राफेल लड़ाकू विमानक बॉडी (फ्यूजलॉज) बनेबा लेल समझौताक घोषणा कएलक।
साझेदारीक तहत, टाटा एडवांस्ड सिस्टम्स लड़ाकू जेटक मुख्य भागक उत्पादन लेल हैदराबादमे एकटा अत्याधुनिक उत्पादन सुविधा स्थापन करत। टाटा एडवांस्ड सिस्टम्स लिमिटेड (टीएएसएल) कहलक जे पहिल फ्यूजलॉज (विमानक धड़) वित्तीय वर्ष 2028 मे असेंबली लाइनसँ बाहर अयबाक आशा अछि। एहि सुविधासँ प्रतिमास दू फ्यूजलॉजक आपूर्ति होयबाक आशा अछि।
बयानमे जानकारी देल गेल अछि जे टीएएसएल हैदराबादमे राफेलक मुख्य संरचनात्मक खंडसभक निर्माण लेल एकटा अत्याधुनिक उत्पादन सुविधा स्थापन करत। एहिमे विमानक बॉडी, पूरा पिछला भाग आ अगिला हिस्सा बनाओल जायत। टीएएसएल कहलक जे ओ भारतमे राफेल लड़ाकू विमानक ढाँचाक निर्माण लेल डसॉ एविएशनक संग चारि उत्पादन हस्तांतरण सम्झौतामे हस्ताक्षर कएलक अछि। ई देशक एयरोस्पेस निर्माण क्षमता केर मजबूत करय आ वैश्विक आपूर्ति शृंखलाक समर्थन करय केर दिशामे एकटा “महत्वपूर्ण कदम” अछि।
डसॉ एविएशनक अध्यक्ष आ सीईओ एरिक ट्रैपियर कहला, “पहिल बेर राफेलक बॉडीक उत्पादन फ्रांसक बाहर भऽ रहल अछि। ई भारतमे हमर आपूर्ति शृंखलाक मजबूत करबाक दिशामे एकटा निर्णायक कदम अछि।
टीएएसएलक मुख्य कार्यकारी अधिकारी आ प्रबंध निदेशक सुकरन सिंह कहलथि जे ई साझेदारी भारतक एयरोस्पेस यात्रामे एकटा महत्वपूर्ण कदम अछि। ओ कहलथि, “भारतमे सम्पूर्ण राफेल विमानक निर्माण टाटा एडवांस्ड सिस्टम्सक क्षमताक प्रति बढ़ैत विश्वास आ डसॉल्ट एविएशन संग हमर सहयोगक मजबूतीकेँ रेखांकित करैत अछि।
ओ कहलनि, “ई कदम भारतक एकटा आधुनिक, मजबूत एयरोस्पेस निर्माण पारिस्थितिकी तंत्र स्थापित करबामे कएल गेल उल्लेखनीय प्रगति दर्शाबैत अछि जे भारत आब वैश्विक प्लेटफार्मकेँ समर्थन कऽ सकैत अछि।”
