केंद्रीय मंत्री गिरिराज सिंह शनिदिन कहलनि जे किछु कट्टरपंथी मुसलमान देशक माहौल खराब करबाक प्रयास कऽ रहल अछि जखनि ओ दावा कयलनि जे वक्फ भूमि पर कुम्भ मेला आयोजित कयल जा रहल अछि। ओ कहलनि जे इस्लामक जन्म नहि भेलाक समयसँ कुम्भ मेला चलि रहल अछि।
केन्द्रीय मंत्री गिरिराज सिंह संवाददाता सभक सङ्ग चर्चाक क्रममे कहलनि जे किछु लोक वातावरण खराब करय चाहैत अछि। ओ पूछलनि, “की कांग्रेस एना करय लेल कहलक, की कांग्रेस माहौल खराब कऽ रहल अछि जे ओ भारतमे बांग्लादेश सन स्थिति उत्पन्न करत ? कुम्भ मेला ओहि समयसँ चलि रहल अछि जखनि इस्लामक जन्म तक नहि भेल छल। ई अनावश्यक रूपसँ हिन्दूसभकेँ भड़का रहल अछि आ हिन्दूसँ झगड़ा करबाक वातावरण बना रहल अछि।”
ओ आगू कहलनि जे कुम्भ मेला पर एहेन बयान देब ठीक नहि अछि। एही पर राहुल गांधी, उद्धव ठाकरे, लालू यादव, अखिलेश यादव चुप कियाक छथि ? सबहक़ मुंहमे बर्फ किएक जमल अछि ?
जनतब जे एहिसँ पहिने अखिल भारतीय मुस्लिम जमातक राष्ट्रीय अध्यक्ष मौलाना शहाबुद्दीन रज़वी बरेलवी कहलनि जे जाहि जमीन पर कुम्भ मेलाक तैयारी कयल जा रहल अछि ओ वक्फक अछि। मुसलमान पैघ हृदयक अछि, अखाड़ा परिषद हुनकर सभक प्रवेशोपर रोक लगा रहल अछि। मौलाना शहाबुद्दीन कहलनि जे प्रयागराजक निवासी सरताज दावा कयने छथि जे जाहि जमीन पर कुम्भ मेलाक तैयारी भऽ रहल अछि ओ वक्फक सम्पत्ति अछि। कहल जाइत अछि जे ई जमीन लगभग ५४ बीघा अछि। मुसलमान लोकनि पैघ हृदय देखबैत आपत्ति नहि कयलक। एहि वक्फ भूमि पर कुम्भ मेलाक सभ व्यवस्था कयल जा रहल अछि। मुदा दोसर दिसि अखाड़ा परिषद आ आन बाबा मुसलमानक प्रवेशपर रोक लगा रहल छथि।
