राजनीतिक बयानबाजीक दौर जारी अछि। नवीनतम घटनाक्रममे कांग्रेस नेता राहुल गाँधी कर्नाटकक बीजापुरमे आयोजित एकटा चुनावी रैलीमे पीएम मोदीपर प्रहार कयलनि। प्रधानमंत्री मोदीपर मगरमच्छक नोर बहैबाक आरोप लगबैत ओ कहलनि जे संभावना अछि जे जल्दिये प्रधानमंत्री मोदी सार्वजनिक रूपसँ राजनीतिक रैलीक दौरान नोर बहाबैत देखल जयताह। राहुल गाँधीक अनुसार, पीएम मोदी २४ घंटा जनताक ध्यान भटकाबयक प्रयासमे लागल छथि।
राहुल गाँधी कहलनि जे पीएम मोदी चौबीसों घंटा अहाँक ध्यान भटकाबय केर कोशिश करैत छथि। कोनो दिन ओ पाकिस्तान आ चीनक बात करत। कोनो दिन ओ अहाँसँ थारी बजाबय कहत आ मोबाइलक टॉर्च चालू करबाक लेल कहताह।
एहि दौरान राहुल कहलनि जे नरेन्द्र मोदी पिछला दस सालमे गरीबसँ मात्र पाइ छीनलनि अछि। ओ देशक २२ लोककेँ ओतेक धन देलनि जतेक देशक ७० करोड़ जनता लग अछि। भारतमे एक प्रतिशत लोक एहेन छथि जे ४० प्रतिशत धन पर नियन्त्रण करैत छथि। एहि लेल कांग्रेस पार्टी बेरोजगारी आ मुद्रास्फीतिकेँ समाप्त कऽ अहाँके भागीदारी देत। नरेन्द्र मोदी अरबपतिसभकेँ जतेक पाइ देलनि अछि, ओतेक हम भारतक गरीबकेँ देब।
एहि दौरान कांग्रेसक वरिष्ठ नेता राहुल कहलनि जे नरेन्द्र मोदी पछिला १० सालमे २०-२५ लोककेँ अरबपति बनौने छथि। ओ हवाई अड्डा, बिजली, खदान, सौर-पवन ऊर्जा, रक्षा क्षेत्र आदि सब किछु अडानी आ हुनका सन अरबपतिकेँ सौंपि देलनि अछि। मुदा गरीबकेँ किछु नहिं देल गेल। कर्नाटकमे कांग्रेस पार्टी द्वारा जतेक गारंटी देल गेल छल। ओ एकरा पूरा कए देखेलक। अहांक थपड़ी एकर सबूत अछि।
कर्नाटकक राजधानी बेंगलुरुक अनेकलमे मतदान केन्द्रक बाहर हंगामा भेल। एतय कांग्रेस आ भाजपा कार्यकर्ताक आपसमे झड़प भेल। मुदा, घटनाक किछुए समय बाद भारी पुलिस बल तैनात कय देल गेल। कहल जा रहल अछि जे किछु कार्यकर्ता वोट मांगय लेल एतय बूथक बाहर पहुंचल छलाह। जकर बाद भाजपा आ कांग्रेस कार्यकर्ताक आपसमे झड़प भेल।
