ई मानक भेटलासँ ललित नारायण मिथिला विश्वविद्यालय आ पटना यूनिवर्सिटीसँ बेहतर श्रेणीमे सिजौलक संदीप युनिवर्सिटी। एतय केर शत-प्रतिशत छात्रकेँ भेटैछ प्लेसमेंट।
*
मधुबनी समदिया
*
बृहस्पतिकेँ संदीप युनिवर्सिटीक चेयरमैन डाॅ. संदीप झा एकटा प्रेस वार्ता कय उच्च शिक्षार्थी सभक लेल खुशखबरी देलनि, जे गुणवत्ताक मानक NAAC प्राप्त करयवाला बिहारक प्रथम युनिवर्सिटी बनल सिजौलक संदीप युनिवर्सिटी। ओ कहलनि जे ई खासकऽ बिहारक हाइयर एजुकेशन प्राप्त करयवाला लेल विशेष उपलब्धि अछि आ ओ एकरा ऐतिहासिक बतेलनि।
ई प्रेस वार्ता मिथिला क्षेत्रीय बिहारक मधुबनी जिलाक सिजौलक संदीप युनिवर्सिटीमे भेल। डाॅ. संदीप झा NAAC गुणवत्ता पर प्रकाश डालैत कहलनि – हायर एजुकेशनक लेल युनिवर्सिटीक गुणवत्ताकेँ परखय लेल विभिन्न कठिन मानक सभसँ गुजरय पड़ैत छैक, जाहिमे NBA, NAAC आदि छैक। NBA मानक बिहारक श्रीराम पोलिटेकनिककेँ भेटल अछि, मुदा गुणवत्तामे NAAC मानक प्राप्त करयवाला सिजौल, मधुबनीक ई संदीप युनिवर्सिटी बिहारक पहिल प्राइवेट यूनिवर्सिटी बनि गेल अछि, जे उच्च शिक्षार्थी सभक लेल खुशखबरी अछि आ ई एकटा ऐतिहासिक उपलब्धि अछि।
ओ कहलनि जे क्वालिटी एजुकेशनमे आब ललित नारायण मिथिला विश्वविद्यालय एवं पटना यूनिवर्सिटीसँ बेहतर श्रेणीमे सिजौलक ई संदीप युनिवर्सिटी आबि गेल अछि। ओ आगू कहलनि कि विशेष बात ई जे NAAC केर मान्यतामे ई साधारण रेंक नहिं बल्कि एकरा तेसर स्थान प्राप्त भेल छैक।
डाॅ. संदीप झा कहैत छथि जे 2017 मे सिजौलक एहि युनिवर्सिटीक स्थापना भेल, 8 सालमे 3 साल कोविडमे चलि गेल, अर्थात मात्र पाँच सालमे एहि युनिवर्सिटीक ऊर्जावान टीम एकरा एहि उपलब्धि तक पहुँचा देलनि, वास्तवमे ओ सभ अभिनंदनक पात्र छथि।
अंतमे सभसँ हर्षक जानकारी डाॅ झा ई देलनि जे ओ कहलनि कि एम्प्लॉयमेंट्री इम्प्रूवमे एहि युनिवर्सिटीक सेंट-परसेंट छात्रकेँ प्लेसमेंट भेटैत छैक, अर्थात कोर्स कंप्लीट होइत नौकरी पक्का। ओ कहलनि एतबहि नहिं बल्कि हर साल एतय जाॅब फेयर लागैत अछि, जाहिमे बिहार वा बाहरक अन्यो युनिवर्सिटीक छात्र सभकेँ प्लेसमेंट होइत छनि, हालक जाॅब फेयरमे 650 छात्र-छात्राक प्लेसमेंट भेल छल।
