अमेरिकी राष्ट्रपति डोनाल्ड ट्रम्प कहलनि जे ओ आइ मंगलकेँ रूसक राष्ट्रपति व्लादिमीर पुतिनसँ बात करताह। ट्रम्प फ्लोरिडासँ वाशिंगटन लेल देर रातिक उड़ानमे एयर फोर्स वनमे पत्रकारसभसँ कहलनि, हम देखय चाहैत छी जे हम ओहि युद्धकेँ भरिसक समाप्त कऽ सकैत छी अथवा नहि। भरिसक हम कऽ सकैत छी अथवा भरिसक हम नहियो कए सकैत छी, मुदा हमरा लगैत अछि जे हमरा लग बहुत नीक मौका अछि। हम मंगलकेँ राष्ट्रपति पुतिनसँ बात करब। सप्ताहांतमे बहुत काज भेल अछि।
एहिसँ पहिने शुक्रकेँ क्रेमलिन कहलनि जे पुतिन अमेरिकी राजदूत स्टीव विटकॉफ’क माध्यमसँ ट्रम्पकेँ युद्धविराम योजनाक विषयमे एकटा संदेश पठौलनि आ “सतर्क आशावाद” व्यक्त कयलनि जे तीन सालक संघर्षकेँ समाप्त करबाक लेल एकटा समझौता भऽ सकैत अछि।
अमेरिकामे रविदिनक विभिन्न कार्यक्रमक क्रममे विटकॉफ, विदेश मंत्री मार्को रुबियो आ ट्रम्पक राष्ट्रीय सुरक्षा सलाहकार माइक वाल्ट्ज एहि बातपर जोर देलनि जे रूस युद्धविरामपर सहमत होयबासँ पहिने बहुत रास चुनौतीक समाधान करब बाकी अछि आ युद्धक अन्तिम शांतिपूर्ण समाधान बहुत दूरक बात अछि।
यूक्रेनक राष्ट्रपति वोलोदिमिर ज़ेलेंस्की शुक्रदिन कहलनि जे हुनका रूसी युद्ध समाप्त करबाक नीक संभावना देखैत अछि। हुनकर बयान कीव द्वारा ३० दिनक अंतरिम युद्धविरामक अमेरिकी प्रस्तावकेँ स्वीकार कयलाक बाद आयल अछि।
जनतब, जे ज़ेलेंस्की लगातार कहलनि अछि जे हुनक देशक सम्प्रभुता पर कोनो समझौता नहि कयल जा सकैत अछि आ रूसकेँ ओहि क्षेत्रकेँ वापिस कऽ देबाक चाही जकरा ओ कब्जा कऽ लेने अछि। रूस २०१४ मे क्रीमिया प्रायद्वीप पर कब्जा कऽ लेलक आ २०२२ मे देश पर आक्रमणक बाद’सँ आब चारिटा पूर्वी यूक्रेनी क्षेत्रकेँ नियंत्रित करैत अछि।
