अमेरिकी राष्ट्रपति डोनाल्ड ट्रम्प कहलनि जे रूसक राष्ट्रपति व्लादिमीर पुतिन यूक्रेनक संग चलि रहल युद्धकेँ समाप्त करबाक लेल बातचीत करबासँ मना कऽ रूसकेँ नष्ट कऽ रहल छथि। ई युद्ध फरवरी २०२२ मे शुरू भेल छल।
सोमदिन ओवल ऑफिसमे पहुँचलाक बाद संवाददाता सभसँ बातचीत करैत ट्रम्प पुतिनसँ शान्ति समझौताक आह्वान कयलनि आ एहि बातपर जोर देलनि जे दीर्घकालिक संघर्षसँ रूस पर भारी प्रभाव पड़ि रहल अछि।
ट्रम्प कहलनि, “पुतिनकेँ समझौता करबाक चाही। हमरा लगैत अछि जे समझौता नहि कए ओ रूसकेँ बर्बाद कए रहल अछि। रूस पैघ मुसीबतमे पड़ए जा रहल अछि।
ट्रम्प उल्लेख कयलनि जे पुतिनक संग बैसारक योजना पहिनेसँ चलि रहल अछि आ समाधान तक पहुँचबाक आशा व्यक्त कयलनि। रूसी नेताक संग अपन बातचीतकेँ याद करैत ट्रंप कहलनि हमर हुनका संग बहुत नीक संबंध छल, हमारा उम्मीद अछि जे ओ समझौता करताह।
युद्धकेँ लंबा चलबाक संबंधमे ट्रंप कहलनि “अधिकांश लोककेँ अनुमान छल जे युद्ध लगभग एक सप्ताहमे खत्म भऽ जायत, मुदा तीन सालमे सेहो नहि खत्म भेल।” ओ मुद्रास्फीतिक प्रभाव सहित रूसकेँ अर्थव्यवस्था पर पड़य वला दबावक सेहो उल्लेख कयलनि।
ट्रंप दावा कयलनि कि यूक्रेनी राष्ट्रपति ज़ेलेंस्की शांति वार्तामे रुचि रखैत छथि। ओ शांति समझौता चाहैत छथि।
अपन चुनाव अभियानक दौरान ट्रम्प संघर्ष समाप्त करबाक वचन देने छलाह। ओ इहो कहलनि जे ओ पदभार ग्रहण करबाक २४ घंटाक भीतर शान्ति स्थापित कऽ सकैत छथि। संवाददातासभकेँ सम्बोधित करैत ओ अपन दृढ़ संकल्पकेँ दोहराबैत कहलनि, “हम एकरा जल्दीसँ जल्दी पूरा करबाक प्रयास करब। अहां जनैत छी, यूक्रेन आ रूसक मध्य युद्ध कहियो शुरू नहि हेबाक चाहैत छल।
ट्रम्पक विदेश मंत्रीक लेल मनोनीत सीनेटर मार्को रुबियो रूसकेँ संघर्षमे “आक्रामक” मानैत कहलनि, “प्रत्येक पक्षकेँ किछु स्वीकार करय पड़त।”
