पूर्णियाक लोकक पूर्णियांसँ हवाई यात्रा करबाक सपना आब किछु मासमे पूरा होबय जा रहल अछि। भारतीय विमानपत्तन प्राधिकरण पूर्णियामे हवाइ अड्डाक निर्माणक डिजाइन तैयार कयलक अछि। जल्दिये पूर्णियाक लोककेँ एहि सुविधाक उपहार भेटत।
कतेको सालसँ स्थानीय लोकसभ पूर्णियामे हवाइ अड्डाक निर्माणक माँग करैत शांतिपूर्ण विरोध प्रदर्शन करैत आबि रहल छथि। गाम आ शहरक लोकक ई पुरान मांग रहल अछि। एहि संदर्भमे पूर्णिया एयरपोर्ट एसोसिएशन कमेटीक महासचिव अरविन्द कुमार झा विशेष बातचीतमे बतौलनि जे पूर्णियाक निवासीमे एहि परियोजना केर लs कs बहुत उत्साह अछि जे बरसोंसँ हवाई अड्डाक प्रतीक्षा कऽ रहल छथि। ओ कहलनि जे भारतीय विमानपत्तन प्राधिकरण द्वारा समय-समय पर जारी डिजाइन आ मॉडल देखैत लोकक अपेक्षा बढ़ि गेल अछि।
महासचिव अरविन्द कुमार झा कहैत छथि जे पूर्णियामे हवाई अड्डा बनयबाक लेल केन्द्र सरकार आ राज्य सरकारसँ, पूर्णियाक लोक पिछला कतेको सालसँ आस लगेने छल। ओ कहलनि जे पिछला कतेको सालसँ हवाई अड्डासँ जुड़ल हर बाधाकेँ दूर कएलाक बाद आब आगाँक काज देखैत लोकमे आशा अछि आ लोक एहि यात्राके जल्द सs जल्द आनंद लेबाक प्रतीक्षामे छथि।
अरविन्द कुमार झा कहैत छथि जे पूर्णियामे हवाई अड्डा बनेबाक डिजाइन आदि परीक्षणक काज भऽ रहल अछि, यद्यपि एखन धरि हवाई अड्डा बनेबाक आधारशिला नहि राखल गेल अछि। ओना, ओ कहलनि जे डिजाइन वा मॉडल भारतीय विमानपत्तन प्राधिकरण द्वारा पठाओल जाइत अछि।
पूर्णिया हवाई अड्डा पर पाँचटा एयरोब्रिजक निर्माणकेँ सेहो डिजाइनमे शामिल कयल गेल अछि। पूर्णिया हवाई अड्डाकेँ स्टेट ऑफ द आर्ट हवाई अड्डा बनयबाक अछि। पूर्णिया हवाई अड्डामे एप्रन, टर्मिनल भवन, कार्गो कॉम्प्लेक्स, एसी चिलर प्लांट, एसटीपी, जल आ फायर टैंक, इलेक्ट्रिक सब-स्टेशन, विमानन ईंधन फार्म, एडमिन कार्यालय, कमर्शियल प्लाजा, सर्फेस पार्किंग, एयरोब्रिज आदिक सुविधा होयत।
