४४.५ मीटर ऊँच ई रॉकेट लगभग १८ मिनटक यात्राक बाद ५५० किलोग्राम वजनक प्रोबा-३ उपग्रहकेँ तय कक्षामे स्थापित करत। प्रोबा-३ (ऑन-बोर्ड स्वायत्तताक परियोजना) मे दूटा उपग्रह शामिल छैक जाहिमे दूटा अंतरिक्ष यान एक सङ्ग उड़त आ सूर्यक बाहरी वायुमण्डलक अध्ययन करबाक लेल एक मिलीमीटर धरि सटीक संरचना बनाकऽ रखत।
इसरो कहलक जे पीएसएलवी-सी५९ ईएसएक प्रोबा-३ उपग्रहकेँ कक्षामे स्थापित करबाक लेल तैयार अछि। एनएसआईएल द्वारा इसरोक अभियांत्रिकी उत्कृष्टताक सङ्ग संचालित ई मिशन अंतर्राष्ट्रीय सहयोगक शक्तिकेँ प्रदर्शित करैत अछि।
प्रोबा ३ मे पठाओल जायवाला उपग्रह आपसमे जुड़ल रहत, जकरा अन्तरिक्षमे अलग कऽ देल जायत। एकर दूटा मुख्य भाग होएत। एकटा भाग प्रयोगात्मक होयत आ दोसर भाग स्थिति उत्पन्न करबाक काज करत। प्रयोगात्मक भागमे कोरोना ग्राफ होयत, जे सूर्यक कोरोनाक चित्र लेत। दोसर भाग एकटा आकल्टर डिस्क होयत, जे लगभग १.४ मीटर आकारक होयत आ १५० मीटरक दूरीसँ कोरोना ग्राफक लेंस पर ८ सेंटीमीटरक छवि बनाओत।
