बलूचिस्तानक प्रांतीय राजधानी क्वेटा’क सिविल अस्पतालमे एकटा पैघ संख्यामे प्रदर्शनकारी घुसि गेल आ किछु शव अपना संग लऽ कऽ भागि गेल। मानल जा रहल अछि जे ई शव बलूच लिबरेशन आर्मी (बीएलए) केर आतंकवादी सभक छल, जे हालमे बोलनमे जाफर एक्सप्रेस यात्री ट्रेन पर हमला कएने छल।
सिविल अस्पतालक बाहर ई प्रदर्शन विवादास्पद बलूच अधिकार कार्यकर्ता महरंग बलूचक नेतृत्व वाला संगठन बलूच यकजेहती कमेटी (बीवाईसी) द्वारा कएल गेल। प्रदर्शनमे लापता व्यक्तिक परिवारक सदस्य अधिकारी सभसँ शवक पहचान करबा लेल अनुमति देबाक माँग क रहल छल। अस्पतालक अधिकारि कहलनि जे प्रदर्शनकारी जबरदस्ती मुर्दाघरमे घुसयमे सफल भेल आ पाँच शव अपना संग लऽ गेल। हालाँकि ई स्पष्ट नहि भेल अछि जे लापता व्यक्तिसभक परिजनसभ शवसभकेँ लेबासँ पहिने हुनकर पहिचान कएलन्हि वा नहि। स्थानीय अधिकारि लोकनि पुष्टि कएलनि जे ओ शव सभ जाफर एक्सप्रेस पैसेंजर ट्रेनक हमलावर सभक छल आ प्रतिबंधित बीएलए उग्रवादी समूहसँ संबंधित छल।
प्रांतीय सरकारक एकटा अधिकारी कहलनि, “जे लाशसभ लऽ गेल, ओ सभ आतंकवादीक अज्ञात लाश छल, जे जाफर एक्सप्रेस पर हमलाक बाद सैन्य अभियानमे मारल गेल छल। एही रिपोर्टक पुष्टि बीवाईसी कार्यकर्ता सेहो कयलनि, जे किछु प्रदर्शनकारी अस्पतालक मुर्दाघरसँ बहुत रास शव अपना संग लऽ गेल।
प्रदर्शनकारी सभक कहब छल जे लापता व्यक्तिसभक परिवार अपन प्रियजनक पहिचान करबाक लेल अस्पतालमे एकत्रित भेल छल।
बीवाईसीक एक सदस्य कहलनि, “हम लापता लोकनिक परिवारक सदस्य सभकेँ ई विश्वास दिआबए लेल दू दिनसँ शवगृह धरि पहुँचबाक प्रयास कए रहल छी जे ओहिठाम राखल शव हुनकर प्रियजनक नहि अछि। “पुलिस अधिकारी सभ क्वेटाकेँ विभिन्न हिस्सामे छापेमारी कयलक, जाहिमे कम सँ कम तीन शव बरामद भऽ गेल। सूत्रक अनुसार, सरियाब रोड आ सचिवालय चौक पर छापेमारी कएल गेल आ लोककेँ हिरासतमे सेहो लेल गेल। बलूचिस्तानमे लापता लोक सभक मुद्दा कऽ उपयोग कऽ देशक सैन्य प्रतिष्ठान आ सरकारी नीतिसभक निशाना बनयबाक मामिलामे बीवाईसी आ ओकर प्रमुख महरंग बलूचक भूमिका केर जाँच कएल जा रहल अछि। एकरा पर बीएलएसँ गठबंधन करबाक आरोप अछि।
