उत्तर प्रदेशक सपा सांसद रामजी लाल द्वारा महाराणा सांगा पर देल गेल बयानक बाद राजस्थान समेत देश भरिमे विरोध प्रदर्शन भ’ रहल अछि। बृहस्पतिकेँ करणी सेनाक अर्जुन सिंह चुंडावतक नेतृत्वमे सैकड़ों कार्यकर्ता उदयपुरक कलेक्ट्रेटक बाहर प्रदर्शन कयलनि। एहि दौरान राष्ट्रपतिक नाम पर एकटा ज्ञापन सेहो सौंपल गेल।
विरोध प्रदर्शन करैत करणी सेनाक पदाधिकारि आ कार्यकर्ता सभ सांसद रामजी लालक बयानकेँ गलत बतौलनि आ हुनका पर कारवाईक मांग क’ रहल छलाह। सम्मानसँ कोनो समझौता नै।
प्रदर्शनक दौरान अर्जुन सिंह चुंडावत एकटा बड़का एलान सेहो कएलनि। ओ कहलनि कि, जे कियो सांसद रामजी लालक जुबान काटि क’ आनत, तऽ ओकरा 5.51 लाख टाका इनाम देल जायत। हुनक कहब छल जे जँ सांसद रामजी लाल अपन शब्द वापस नहि लेलनि आ सार्वजनिक रूपसँ माफी नहि मांगलनि त’ उग्र आंदोलन कएल जायत।
चुंडावत कहलनि जे महाराणा सांगा मात्र मेवाड़क नहि बल्कि पूरा भारतक गौरव छथि, हुनक सम्मानसँ कोनो समझौता नै कएल जायत। इतिहाससँ अनजान लोकनिक एहि प्रकारक टिप्पणी करबासँ पहिने सोचब आवश्यक अछि। चुंडावत आ करणी सेना केर प्रदर्शनक दौरान बड़ संख्यामे लोक जुटल आ सरकारसँ एहि मामिलामे तुरंत कारवाई केर मांग कएल।
सांसदक बयानक बादसँ सम्पूर्ण मेवाड़मे रोष व्याप्त अछि। सामाजिक संगठन, राजपूत समाज आ विभिन्न राजनैतिक दल सभ सेहो सांसदक बयानक निंदा कएलनि अछि। करणी सेना स्पष्ट रूपसँ कहलक जे जाधरि रामजी लाल अपन बयान पर माफी नहि मांगत, ताधरि हुनकर विरोध जारी रहत। विरोध केर देखैत प्रदेश सरकार आ प्रशासन अलर्ट अछि। कारण, एहनसँ राज्यमे कानून व्यवस्था प्रभावित भ’ सकैत अछि।
समाजवादी पार्टीक राष्ट्रीय महासचिव आ सांसद रामजी लाल सुमन राज्यसभामे महाराणा सांगाकेँ गद्दार कहलनि। ओ कहलनि जे भाजपा केर लोकक तकिया कलाम भ’ गेल अछि जे मुसलमान सभमे बाबरक डीएनए अछि। आखिर बाबरकेँ अनलक के ? इब्राहिम लोधीक हराबय लेल बाबरकेँ राणा सांगा हिंदुस्तानमे अनने छलाह। जँ मुसलमान बाबरक औलाद छथि, त’ तखन अहाँ गद्दार राणा सांगाक औलाद छी। एही बयान पर हंगामा भऽ रहल अछि।
