कांग्रेस उम्मीदवार प्रियंका गांधी वाड्रा बुधदिन वायनाड लोकसभा सीटसँ अपन नामांकन पत्र दाखिल करतीह। ओ कलपेट्टामे निर्वाचन अधिकारीक समक्ष अपन नामांकन दाखिल करतीह। एहि अवसर पर कांग्रेसक राष्ट्रीय अध्यक्ष मल्लिकार्जुन खड़गे, कांग्रेस नेता सोनिया गांधी आ नेता प्रतिपक्ष राहुल गांधी सहित कतेको अन्य नेता उपस्थित रहताह।
नामांकन पत्र दाखिल करबासँ पहिने प्रियंका गाँधी वाड्रा आ राहुल गाँधीक भोर ११ बजे कलपेट्टा न्यू बस स्टैण्ड पर रोड शो होएत। एहि रोड शो केर माध्यमसँ ओ ताकत देखेतीह। एकर बाद प्रियंका गांधी वाड्रा कलेक्टरक सामने अपन नामांकन पत्र दाखिल करतीह। वायनाड लोकसभा सीटक उपचुनाव १३ नवम्बरकेँ होयत आ परिणाम २३ नवम्बरकेँ घोषित कयल जायत।
कांग्रेस नेता राहुल गाँधी लोकसभा चुनाव २०२४मे वायनाड आ रायबरेलीसँ चुनाव जीतबामे सफल रहलाह। एकर बाद ओ वायनाडसँ इस्तीफा दऽ रायबरेलीसँ सांसद बनल रहबाक निर्णय लेलनि। रायबरेली गाँधी परिवारक पारम्परिक सीट अछि।
२०१९ केर लोकसभा चुनावमे कांग्रेस नेता राहुल गाँधी दूटा लोकसभा सीटपर चुनाव लड़लनि, मुदा अमेठीमे हुनका भाजपा नेता स्मृति ईरानीक हाथसँ हारक सामना करय पड़लनि। एकर बाद २०२४ केर लोकसभा चुनावमे पार्टी अपन रणनीति बदलि राहुल गाँधीकेँ अमेठीक बदला रायबरेलीसँ मैदानमे उतारलक आ पार्टीक ई रणनीति राहुल गाँधीक जीतक रूपमे सामने आयल। एहि बेर राहुल गाँधी दुनू सीट जीतबामे सफल रहलाह। बादमे ओ एकटा सीटसँ इस्तीफा दऽ देलनि।
राहुल गांधीक वायनाडसँ इस्तीफाक बाद आब ओतय उपचुनाव होबय जा रहल अछि। कांग्रेस प्रियंका गाँधीकेँ मैदानमे उतारने अछि जखनि कि भाजपा नाव्या हरिदासकेँ एहि सीटसँ मैदानमे उतारने अछि। एकर बाद एतय प्रतिस्पर्धा बहुत रोचक बनैत देखाइत अछि।
