प्रधान जिला आ सत्र न्यायाधीश विनोद कुमार तिवारी उपकारा (जेल) बेनीपुरक निरीक्षण कयलनि । ओ बारी बारीसँ महिला आ पुरुष वार्ड , चिकित्सालय , पाकशाला आदि केर बारिकीसँ देखलनि। महिला वार्डमे महिला बंदी सभसँ हुनका सबहक खान-पान, स्वास्थ्य सुविधा आदि केर बारेमे पूछलनि। महिला बंदी सबहक संग रहयवला बच्चा सभकेँ भेटयवला सुविधा सबहक बारेमे सेहो पूछलनि। पुरुष वार्ड सभमे पुरुष बंदी सभसँ खान-पान, स्वास्थ्य, साफ – सफाई , पीबाक पाइन आदि केर बारेमे विस्तृत जानकारी लेलन्हि ।
चिकित्सालयमे मौजूद डाक्टर सलमान रजासँ स्वास्थ्य सुविधा, उपलब्ध दवाई आ चिकित्सा उपकरण सबहक संबंधमे पूछताछ कयलनि। पाकशालामे कैदी सभ लेल पाकि रहल भोजनक जांच पड़ताल कयल गेल। प्रधान जिला जज तिवारी बंदी सभकेँ जिला विधिक सेवा प्राधिकार दिसिसँ भेटयवला निःशुल्क विधिक सेवा केर बारेमे बंदी सभसँ पूछलनि। ओ ओकरा सभसँ कहलनि जे कियो भी बंदी जिनका अपना मुकदमाक पैरवी लेल अधिवक्ता केर सेवा निःशुल्क चाहियैन तऽ ओ जेल लीगल एड क्लिनिक केर जरिए आवेदन कऽ सकैत छथि आ हुनका अधिवक्ता भेटतन्हि।
जेलमे 207 पूरुष आ 11 महिला बंदी छलथि । महिला बंदी संग दूगो बच्ची सेहो अछि। मौका पर एसीजेएम संगीता रानी, काराधीक्षक स्नेहलता , जेलर रत्नेश कुमार राय , डाॅ० सलमान रजा , स्टेनो चांद बाबू , नाजिर संतोष कुमार , प्राधिकार सहायक कुमार गौरव आदि मौजूद छलथि।
