बांग्लादेशक प्रधानमंत्री शेख हसीना मंगलदिन पुलिस आ प्रदर्शनकारीक बीच हिंसक झड़पक बाद कर्फ्यू लगयबाक आ गोली मारबाक आदेश देबाक अपन निर्णयक बचाव करैत कहलनि जे लोकक जान आ सम्पत्तिक सुरक्षा सुनिश्चित करबाक लेल कठोर उपाय उठाओल गेल।
हसीनाक टिप्पणी बांग्लादेशक सर्वोच्च न्यायालय द्वारा प्रदर्शनकारीसभक सरकारी नौकरीमे आरक्षणक सीमा कटौती करय केर एक दिन बाद आयल अछि।
देशमे पुलिस आ मुख्य रूपसँ छात्र प्रदर्शनकारीक बीच झड़प भेल। प्रदर्शनकारी १९७१ केर बांग्लादेश मुक्ति युद्ध लड़निहार (पूर्व) सैनिकक रिश्तेदारक लेल सरकारी नौकरीमे ३० प्रतिशत आरक्षण समाप्त करबाक माँग कऽ रहल छथि।
कमसँ कम चारिटा स्थानीय अखबार खबरि देलक जे एहि हिंसामे १०० सँ बेसी लोकक मृत्यु भऽ चुकल अछि। अधिकारी एखन धरि हिंसामे भेल मृत्युक आधिकारिक आंकड़ा साझा नहिं कयलनि अछि।
बांग्लादेशक सर्वोच्च न्यायालय रविदिन फैसला देलक जे ९३ प्रतिशत सरकारी नौकरी योग्यता आधारित प्रणाली पर, पाँच प्रतिशत १९७१ केर बांग्लादेश मुक्ति युद्धमे भाग लेनिहारक परिवारक सदस्यक लेल आ दू प्रतिशत सीट अन्य श्रेणीक लेल आवंटित कयल जाय।
एकटा वक्तव्यमे हसीना कहलनि जे “पूर्ण बंदी” लागू होयब आ आरक्षण आन्दोलनसँ जुड़ल हालक घटनासभ देशभरिमे आम लोकक जीवन आ आजीविकाकेँ प्रभावित कयलक अछि। ओ दावा कयलनि जे विपक्षी बांग्लादेश राष्ट्रवादी पार्टी (बीएनपी) मेट्रो रेल, एक्सप्रेसवे, पुल भवन, आपदा प्रबंधन भवन, विभिन्न सरकारी आ निजी भवन आ घरमे संगठित तरीकासँ आगजनी आ तोड़फोड़ कयलक।
हसीना हिंसाक लेल मुख्य विपक्षी बांग्लादेश राष्ट्रवादी पार्टी आ जमात-ए-इस्लामी आ ओकर छात्र शाखाकेँ दोषी ठहरौलनि। हसीना कहलनि जे एहि परिस्थितिकेँ देखैत सरकार लोकक जीवन आ सम्पत्तिक सुरक्षा सुनिश्चित करबाक लेल आ जनजीवन सामान्य करबाक लेल अस्थायी रूपसँ कर्फ्यू लगा देलक अछि।
