हिंसाग्रस्त मणिपुरक दौरा नहि करबाक लेल प्रधानमंत्री नरेन्द्र मोदी पर तीक्षण हमला करैत कांग्रेस मंगलदिन कहलक जे हुनका लग पूरा दुनियामे जयबाक समय, इच्छा आ ऊर्जा अछि मुदा पूर्वोत्तर राज्यक व्यथित लोकसभ धरि पहुँचब जरुरी नहि बुझलनि।
मणिपुरमे शुरू भेल भारत जोड़ो न्याय यात्रा’क पहिल वर्षगाँठपर कांग्रेसक ई आक्रोश आयल।
कांग्रेस पछिला साल १४ जनवरीकेँ मणिपुरसँ राहुल गाँधीक नेतृत्वमे ‘भारत जोड़ो न्याय यात्रा’ शुरू कयलक जाहिमे बेरोजगारी, मूल्य वृद्धि आ सामाजिक न्याय सन मुद्दा पर ध्यान केन्द्रित कयल गेल छल। मुम्बईक शिवाजी पार्कमे कांग्रेसक रैली ‘भारत जोड़ो न्याय यात्रा’क समापन छल, जे लोकसभा चुनावक दौरान हाइब्रिड मोडमे चलाओल गेल छल।
कांग्रेस महासचिव जयराम रमेश एक्स पर एकटा पोस्टमे कहलनि, “आइ, ठीक एक साल पहिने भारतीय राष्ट्रीय कांग्रेस द्वारा मणिपुरसँ भारत जोड़ो न्याय यात्रा शुरू कयल गेल छल। ‘भारत जोड़ो न्याय यात्रा’ ऐतिहासिक कन्याकुमारीसँ कश्मीर भारत जोड़ो यात्राक बाद १५ राज्यसँ गुजरैत ६,६०० किलोमीटरक दूरी तय कयलक, जे १६ मार्च, २०२४ केँ मुम्बईमे समाप्त भेल।”
ओ कहलनि, मणिपुर एखनो प्रधानमंत्रीक यात्राक प्रतीक्षा कऽ रहल अछि, जिनका लग दुनिया भरिमे यात्रा करबाक समय, इच्छा आ ऊर्जा अछि, मुदा ओ मणिपुरक व्यथित लोकसभ धरि पहुँचब जरुरी नहिं बुझलनि।”
रमेश आरोप लगओलनि जे प्रधानमंत्री मणिपुरक राजनीतिक नेतासभसँ भेँट करबासँ लगातार मना कऽ देने छथि, जाहिमे हुनक अपन पार्टीक विधायक आ स्वयं मुख्यमंत्री सेहो शामिल छथि।
मणिपुरक पीड़ा ३ मई, २०२३ सँ लगातार जारी अछि। किछु दिन पहिने शिक्षा, महिला, बच्चा, युवा आ खेल पर संसदक स्थायी समितिकेँ राज्यक प्रस्तावित अध्ययन दौरा स्थगित करबाक लेल कहल गेल छल।
कांग्रेस मणिपुरक दौरा नहि करबाक लेल प्रधानमंत्रीपर हमला कऽ रहल अछि आ जातीय संघर्षग्रस्त पूर्वोत्तर राज्यक स्थितिसँ निपटबाक लेल केन्द्रक आलोचना सेहो कऽ रहल अछि।
जनतब जे मई २०२३ सँ इम्फाल घाटीमे “मैतेई” आ लगपासक पहाड़मे “कुकी-जो” समूहक बीच जातीय हिंसामे २२०सँ बेसी लोकक मृत्यु भऽ गेल अछि आ हजारो लोक बेघर भऽ गेल अछि।
