प्रधानमंत्री मोदीक ‘एक पेड़ माँ के नाम’ अभियान बनल आन्दोलन : अमित शाह

इंदौर
*

इन्दौरमे ‘एक पेड़ माँ के नाम’ अभियानक अन्तर्गत ५१ लाख पौधा रोपबाक संकल्प लेल गेल अछि आ रविदिन ११ लाख पौधा रोपल गेल। एहि कार्यक्रममे भाग लेनिहार केन्द्रीय गृह मंत्री अमित शाह कहलनि, “प्रधानमंत्री पूरा देशक जनतासँ आह्वान कयलनि आ एहि बरसातक मौसममे ‘एक पेड़ माँ के नाम’ अभियानक शुरुआत कयलनि।

शाह कहलनि, “जखनि प्रधानमंत्री नरेन्द्र मोदी ई अभियान शुरू कयलनि, तखनि कियो नहिं जनैत छल जे ई एकटा नारा आन्दोलन बनि जायत। आइ पूरा देशक प्रत्येक व्यक्ति अपन मायक नाम पर पौधा रोपि अपन माता आ धरती माताकेँ नमन करबाक काज कऽ रहल अछि। इन्दौर पूरा देशमे स्वच्छताक लेल जानल जाइत अछि, इन्दौर स्वादक लेल सेहो जानल जाइत अछि, इन्दौर सुशासन-सहयोग आ सहभागिताक लेल सेहो जानल जाइत अछि। आइसँ एहि इन्दौरक वृक्षारोपण ‘एक पेड़ माँ के नाम’क नामसँ सेहो जानल जायत। आइ हम एकटा विश्व रिकॉर्ड बनाबए जा रहल छी। ई कीर्तिमान अहिल्याबाई शहरकेँ पूरा दुनियामे प्रसिद्ध कऽ देत। इन्दौर स्मार्ट सिटी बनिये गेल छल, मेट्रो सिटी बनल, स्वच्छ शहर सेहो बनल, आधुनिक शिक्षाक केन्द्र बनि गेल आ आब इन्दौर ग्रीन सिटीक नामसँ जानल जायत।”

केन्द्रीय गृह मंत्री मत्स्य पुराणमे गाछक विषयमे कहल गेल बातक उल्लेख कयलनि। ओ कहलनि, “१० इनारक बराबर एकटा बावड़ी होइत अछि, १० बावड़ीक बराबर एकटा पोखरि होइत अछि, १० पोखरिक बराबर एकटा पुत्र होइत अछि आ १० पुत्रक बराबर एकटा गाछ होइतअछि।”

मध्य प्रदेशक वन क्षेत्रक उल्लेख करैत ओ कहलनि, “मध्य प्रदेश पूरा देशकेँ ऑक्सीजन देबाक काज करैत अछि। मध्य प्रदेश ओ राज्य अछि जतय ३१ प्रतिशत वन क्षेत्र अछि, राज्यक ३१ प्रतिशत क्षेत्र वन आच्छादित अछि आ सम्पूर्ण देशक कुल वन क्षेत्रक १२ प्रतिशत मध्य प्रदेशक भीतर अछि। एहि लेल राज्यक भीतर पर्यटनक विकास भेल अछि। ”

ओ लोकसभसँ आह्वान कयलनि, “जे पौधा रोपने छथि, हुनका पौधा बढ़बा धरि अपन बेटा जकाँ एकर चिन्ता करबाक चाही, बादमे ई गाछ अहाँक चिन्ता माय जकाँ करत, हमरा विश्वास अछि।”