दिल्लीक मुख्यमंत्री अरविन्द केजरीवाल शनिदिन हनुमान मन्दिरमे पूजा-अर्चना कयलनि आ फेर पार्टी कार्यालयमे अपन पार्टीक नेतासभक सङ्ग बैसार कयलनि। एकर बाद केजरीवाल भाजपा पर जोरदार निशाना साधलनि।
केजरीवाल कहलनि “दूटा राज्यमे हमर सरकार अछि आ हम मात्र १० साल पुरान पार्टी छी। मुदा प्रधानमंत्री एहि पार्टीकेँ नष्ट आ कुचलबामे कोनो कसरि नहि छोड़ने छथि। ओ सभ हमर पार्टीक चारिटा शीर्ष नेताकेँ एक सङ्ग जेल पठा देलनि। जँ पैघ दलक शीर्ष चारि नेता जेल जाइत छथि तखन पार्टी समाप्त भऽ जाइत अछि। मुदा आम आदमी पार्टी कोनो पार्टी नहिं अछि, ई एकटा विचार अछि। जतेक बेसी अहाँ एकरा समाप्त करए चाहैत छी, ओ ओतेक बढ़ैत अछि।”
ओ कहलनि जे जँ भाजपा नीक काज करैत अछि तँ आम आदमी पार्टीसँ कियो नहि पूछत, मुदा ओ काज नहिं करैत अछि आ आपकेँ कुचलय चाहैत अछि। भाजपा पर हमला करैत अरविन्द केजरीवाल कहलनि जे प्रधानमंत्री कहैत छथि, हम भ्रष्टाचारक विरुद्ध लड़ि रहल छी मुदा हजारो करोड़क घोटाला करयवला लोकसभकेँ अपन पार्टीमे शामिल कऽ लैत छथि। ओ केकरो उप मुख्यमंत्री बनबैत छथि, केकरो मंत्री बनबैत छथि। हुनकर खिलाफ चलि रहल ईडी आ सीबीआई केर सब मामिला खतम कऽ दैत छथि। हम मोदी जीसँ कहय चाहैत छी जे अगर अहां भ्रष्टाचारक खिलाफ लड़य चाहैत छी तऽ केजरीवालसँ सीख लिअ। २०१५ मे हमरा एकटा मंत्री द्वारा एकटा दोकानदारसँ ५ लाख टाका माँगबाक ऑडियो भेटल, हम तुरन्त ओकरा सीबीआईकेँ सौंपि देलहुँ। ई भ्रष्टाचारक खिलाफ लड़ाई अछि।
ओ कहलनि “हमरा गिरफ्तार कऽ प्रधानमंत्री पूरा देशकेँ संदेश देलनि अछि जे जँ हम अरविन्द केजरीवालकेँ बिना कोनो मामिलाक जेलमे राखि सकैत छी तँ हम ककरो गिरफ्तार कऽ सकैत छी। प्रधानमंत्री “वन नेशन, वन लीडर” नामक एकटा बहुत खतरनाक मिशन शुरू कयलनि अछि। प्रधानमंत्री “एक राष्ट्र, एक नेता”क मार्ग पर चलि रहल छथि। मोदी जी सबकेँ जेलमे डालि पूरा विपक्षकेँ खत्म करय चाहैत छथि।
ओ कहलनि, “जँ ई चुनाव जीति गेलाह तऽ हमरासँ ई लिखबा लिअ जे ममता दीदी जेलक भीतर रहत, स्टालिन जेलक भीतर रहत, उद्धव ठाकरे जेलक भीतर रहत आ अन्य नेता सेहो जेलक भीतर रहताह। ओ आरोप लगओलनि जे प्रधानमंत्री अपन पार्टीक पैघ नेताकेँ सेहो दरकिनार कऽ रहल छथि।
भाजपा पर हमला करैत केजरीवाल कहलनि जे जँ भाजपा चुनाव जीतैत अछि तँ ओ २ मासक भीतर उत्तर प्रदेशक मुख्यमन्त्री बदलि देत।
अरविन्द केजरीवाल कहलनि जे हम सुप्रीम कोर्टकेँ धन्यवाद देबय चाहैत छी। ओ हमरा २१ दिन देलनि। एक दिनमे २४ घंटा होइत अछि। मुदा हम 36 घंटा काज करब। हम एहि तानाशाहीकेँ रोकबाक लेल देश भरिमे घूमब। ई लोक इंडिया गठबंधनसँ पूछैत छथि जे अहाँक प्रधानमंत्री के होयत, हम भाजपासँ पूछय चाहैत छी जे अहाँक प्रधानमंत्री के होयत। मोदी जी स्वयं एकटा नियम बनौने छलाह कि जे ७५ वर्षक होयत ओ सेवानिवृत्त होयत आ मोदी जी स्वयं अगिला साल १७ सितम्बर केँ ७५ वर्षक भऽ जयताह।
