प्रधानमंत्री मोदी मंगलकेँ दू दिवसीय दौरा पर मॉरीशस पहुंचलाह। प्रधानमंत्रीक स्वागतमे मॉरीशसक समकक्ष नवीन चन्द्र रामगुलाम हुनका सर शिवसागर रामगुलाम अंतरराष्ट्रीय एयरपोर्ट पर पुष्पक माला पहिरा स्वागत कयलनि। एकर अतिरिक्त 24 कैबिनेट मंत्री आ 200 गणमान्य प्रधानमंत्रीकेँ पोर्ट लुईस एयरपोर्ट पर भव्य स्वागत कयलनि। भारतीय समुदाय द्वारा पीएम मोदीक गर्मजोशीसँ स्वागत कयल गेल। समुदायक महिला लोकनि ‘गीत गवई’ नामक पारम्परिक बिहारी सांस्कृतिक प्रस्तुतिक माध्यमसँ हुनका सम्मानित कयलनि।
प्रधानमंत्री पोर्ट लुइसमे मॉरीशसक राष्ट्रपति धरम गोखूलसँ भेंट कयलनि आ हुनका महाकुम्भक पवित्र गंगाक जल भेंट कयलनि। ई कुम्भ २६ फरवरीकेँ समाप्त भेल अछि, जाहिमे प्रयागराजक त्रिवेणी संगममे ६६ करोड़सँ बेसी तीर्थयात्री जमा भेलाह, जाहिसँ ई दुनियाक सबसँ पैघ मानव सभा बनि गेल। गोखूलकेँ दिसम्बरमे सर्वसम्मतिसँ मॉरीशसक नव राष्ट्रपति चुनल गेल। ओ पृथ्वीराजसिंह रूपनक स्थान लेलनि, जिनकर कार्यकाल २ दिसंबर, २०२४ केँ समाप्त भेल। पूर्व शिक्षा मंत्री रूपन एकटा प्रतिष्ठित राजनीतिज्ञ छथि जिनकर शिक्षा, जनसेवा आ राजनीतिमे उल्लेखनीय कैरियर छनि। ओ पीएम मोदीक राजकीय भोजक मेजबानी सेहो कऽ रहल छथि।
एहिसँ पहिने प्रधानमंत्री मोदी पोर्ट लुइसमे शिवसागर रामगुलाम बॉटनिकल गार्डनमे मॉरीशसक पहिल प्रधानमंत्री आ संस्थापक शिवसागर रामगुलामकेँ श्रद्धांजलि देलनि। ओ पूर्व राष्ट्रपति आ प्रधानमन्त्री सर अनिरूद जगन्नाथकेँ सेहो श्रद्धांजलि देलनि।
प्रधानमंत्री मोदी अपन एक्स अकाउंटपर लिखलनि, “हम दूटा महान नेता, शिवसागर रामगुलाम आ सर अनिरूद्ध जगन्नाथकेँ श्रद्धांजलि देलहुँ, जे मॉरीशसक प्रगतिमे अमिट योगदान देलनि।”
प्रधानमंत्री मोदी स्मारकपर पुष्पांजलि अर्पित कयलनि आ मॉरीशसक प्रधानमंत्री नवीन चन्द्र रामगुलमक संग एकटा पौधा सेहो रोपलनि। ओ कहलनि, “प्रकृति, मातृत्व, आ स्थिरताक लेल समर्पित ‘एक पेड़ मां के नाम’ कार्यक्रममे अपन मित्र प्रधानमंत्री डॉ. नवीन रामगुलाम केर हार्दिक भागीदारीसँ हम बहुत प्रभावित छी। हुनकर समर्थन हरियाली आ बेहतर भविष्यक प्रति हमर साझा प्रतिबद्धताक प्रतीक अछि।
मोदी कहलनि “मॉरीशसमे भारतीय समुदाय द्वारा हमरा कयल गेल गर्मजोशीसँ स्वागतसँ हम बहुत प्रभावित छी। भारतीय धरोहर, संस्कृति आ मूल्यक सङ्ग हुनक गहींर जुड़ाव वास्तवमे प्रेरणादायक अछि। इतिहास आ हृदयक ई बंधन पीढ़ी-दर-पीढ़ी चलैत आबि रहल अछि।”
प्रधानमंत्री मोदी बुधदिन मुख्य अतिथिक रूपमे देशक राष्ट्रीय दिवस समारोहमे भाग लेताह। भारतीय नौसेनाक एकटा जहाजक सङ्ग भारतीय सशस्त्र सेनाक एकटा टुकड़ी सेहो समारोहमे भाग लेत। २०१५ केर बाद प्रधानमंत्री मोदीक ई पहिल मॉरीशस यात्रा अछि। प्रधानमंत्री मोदीक वर्तमान यात्रासँ विभिन्न क्षेत्रमे सहयोगकेँ आओर मजबूत होयबाक आशा अछि।
