प्रधानमंत्री नरेंद्र मोदी काल्हि बुधदिन नामीबिया केर राजधानी विंडहोक पहुँचलाह, जतय हुनक भव्य स्वागत कयल गेल।
औपचारिक स्वागतक तौर पर पीएम मोदीकेँ 21 तोपक सलामी देल गेल। स्वागत समारोहसँ हुनक नामीबिया केर एक दिनक यात्राक दौरान आधिकारिक कार्यक्रमक शुरुआत भेल।
प्रधानमंत्री मोदीक स्वागत अफ्रीकी राष्ट्रक राष्ट्रपति नेतुम्बो नंदी-न्दैतवाहा कयलनि। एकर संबंधमे पीएम मोदी सोशल मीडिया प्लेटफॉर्म ‘एक्स’ पर पोस्ट करैत कहलनि कि नामीबियामे भारतीय समुदाय भारत आ नामीबिया केर बीच घनिष्ठ दोस्तीक बारेमे बहुत आशावादी अछि आ ई बात विंडहोकमे भेटल विशेष स्वागतमे परिलक्षित होइत अछि। हमरा अपन प्रवासी समुदाय पर गर्व अछि, खास कऽ जाहि तरीकासँ ओ अपन संस्कृति आ परंपरासँ अपन जुड़ाव बनौने छथि।
प्रधानमंत्री मोदी अपन पांच देशक यात्राक अंतिम चरणमे नामीबिया पहुंचल छलाह। होसे कुटाको अंतर्राष्ट्रीय हवाई अड्डा पर हुनक भव्य पारंपरिक स्वागत कयल गेल, जतय हुनक स्वागत नामीबिया केर अंतर्राष्ट्रीय संबंध आ सहयोग मंत्री सेल्मा अशिपाला-मुसावी कयलनि। स्वागत समारोहमे स्थानीय संगीतकार आ नर्तकी सब अपन प्रस्तुति देलनि आ वाहवाही आ जयजयकारक बीच प्रधानमंत्री कलाकार सब संग जुड़लाह।
प्रधानमंत्री मोदी केर ई नामीबिया केर पहिल यात्रा अछी आ पिछला २७ सालमे भारतीय प्रधानमंत्री केर ई तेसर यात्रा अछि। पीएम मोदी देश केर संस्थापक आ पूर्व राष्ट्रपति डॉ. सैम नुजोमाकेँ सेहो श्रद्धांजलि देलनि।
भारत आ नामीबियाक बीच बहुत मजबूत संबंध बहुत दिनसँ अछि आ नई दिल्ली नामीबियाक आजादीकेँ बहुत पहिने मान्यता देने छल। ई मुद्दा १९४६ मे संयुक्त राष्ट्र महासभामे सेही उठल छल।
दूनू देशक बीच द्विपक्षीय व्यापार मुख्य रूपसँ जस्ता आ हीरा जेहेन खनिज संसाधनमे होइत अछि । नामीबिया संसाधन संपन्न देश अछि। एहिमे यूरेनियम, तांबा, कोबाल्ट, दुर्लभ पृथ्वी, लिथियम, ग्रेफाइट, टैंटलम जेहन प्राकृतिक संसाधन अछि। भारत नामीबियासँ किछु चीता सेहो अनलक आ मध्य प्रदेशक कुनो नेशनल पार्कमे छोड़ि देलक।
