भुवनेश्वरमे उत्कर्ष ओडिशा मेक इन ओडिशा कॉन्क्लेव २०२५केँ सम्बोधित करैत प्रधानमंत्री नरेन्द्र मोदी कहलनि जे पछिला किछु दिनमे अहाँ मुम्बई आ अहमदाबादमे कोल्डप्ले संगीत कार्यक्रमक महान चित्र देखलहुँ, एहिसँ पता चलैत अछि जे भारतमे लाइव कॉन्सर्ट’क कतेक गुंजाइश अछि।
पीएम मोदी कहलनि “अहाँ मुम्बई आ अहमदाबादमे कोल्डप्ले संगीत कार्यक्रमक शानदार चित्र देखलहुँ। एहिसँ स्पष्ट रूपसँ पता चलैत अछि जे भारतमे लाइव संगीत कार्यक्रमक बहुत रास संभावना अछि। दुनिया भरिक पैघ कलाकार भारत दिसि आकर्षित छथि, हमरा आशा अछि जे राज्य आ निजी क्षेत्र आवश्यक बुनियादी ढाँचा आ कौशल पर ध्यान देत।”
ओ कहलनि, “दुनिया भरिक पैघ कलाकार सेहो भारत दिसि आकर्षित भऽ रहल छथि। संगीत कार्यक्रमक अर्थव्यवस्था पर्यटनकेँ बढ़ावा दऽ रहल अछि आ पैघ स्तरपर रोजगारक सृजन कऽ रहल अछि। हम राज्य आ निजी क्षेत्रसँ आग्रह करैत छी जे ओ संगीत कार्यक्रमक अर्थव्यवस्थाक लेल आवश्यक बुनियादी ढाँचा पर ध्यान केन्द्रित करथि। चाहे ओ इवेंट मैनेजमेंट होय, आर्टिस्ट ग्रूमिंग होय, सुरक्षा होय वा अन्य व्यवस्था। एहि सभ क्षेत्रमे नव अवसर उभरि रहल अछि।”
ब्रिटिश बैंड कोल्डप्ले नहिं मात्र मुम्बई आ अहमदाबादमे पाँचटा कार्यक्रमसँ प्रशंसकसभकेँ मंत्रमुग्ध कयलक, बल्कि एहि अवधिमे नव कीर्तिमान सेहो स्थापित कयलक। भारतमे हुनक अन्तिम संगीत कार्यक्रम रविदिन अहमदाबादमे भेल छल। कोल्डप्ले, मुख्य गायक क्रिस मार्टिनक संग अपन म्यूजिक ऑफ द स्फीयर्स वर्ल्ड टूरक दौरान भारतमे पाँचटा संगीत कार्यक्रम प्रस्तुत कयलनि। बैंड मुम्बईमे तीनटा कार्यक्रमसँ प्रारम्भ कयलक आ फेर अहमदाबादक नरेन्द्र मोदी स्टेडियममे लगातार दूटा प्रदर्शनक संग समाप्त भेल।
पीएम कहलनि, “अगिला महीना, भारत पहिल बेर विश्व ऑडियो विजुअल शिखर सम्मेलन वा वेव्सक आयोजन करत। ई एकटा विशाल आयोजन होयत जे भारतक रचनात्मक कौशलकेँ दुनियाकेँ प्रदर्शित करत।” राज्यमे एहेन आयोजनसँ उत्पन्न राजस्व आ लोकक बीच उत्पन्न धारणा सेहो अर्थव्यवस्थाकेँ आगू बढ़बामे योगदान देत।”
