प्रधानमंत्री नरेन्द्र मोदी १३ नवम्बरकेँ दरभंगामे एम्सक आधारशिला रखताह। राज्यक स्वास्थ्य मंत्री मंगल पाण्डेय रविदिन ई जानकारी देलनि। संवाददाता सभसँ बातचीत करैत पाण्डेय कहलनि जे मोदी बुधदिन दरभंगा अओताह जखनि सुपर स्पेशियलिटी प्रोजेक्टक लेल भूमि पूजन सेहो होयत।
स्वास्थ्य मंत्री मंगल पाण्डेय कहलनि जे एहि अवसर पर बिहारक मुख्यमंत्री नीतीश कुमार, केन्द्रीय मंत्री चिराग पासवान आ जीतन राम मांझी सहित अन्य गणमान्य व्यक्ति उपस्थित रहताह।
राजधानी पटनाक बाद अखिल भारतीय आयुर्विज्ञान संस्थान (एम्स) बला मिथिला क्षेत्रीय इ शहर राज्यक दोसर शहर बनि जायत। १७०० करोड़ टाकाक अनुमानित लागत वला ई परियोजना समस्त मिथिला आ नेपाल सहित लगपासक क्षेत्रक लोकक लेल बहुत लाभदायक होयत। एम्स, दरभंगा एहि बातक प्रमाण अछि जे केन्द्रक सङ्ग-सङ्ग राज्यमे सत्तारूढ़ राष्ट्रीय जनतांत्रिक गठबंधन (एनडीए) सभ क्षेत्रक विकासक लेल काज करैत अछि आ समाजक सबसँ जरूरतमंद वर्गक देखभाल करैत अछि।
