पीएम मोदी सोमदिन सोशल मीडिया प्लेटफॉर्म एक्स पर लिखलनि, “न्यायमूर्ति संजीव खन्नाक शपथ ग्रहण समारोहमे शामिल भेलहुँ। ओ भारतक सर्वोच्च न्यायालयक मुख्य न्यायाधीशक रूपमे शपथ लेलनि अछि। हुनका कार्यकालक लेल हमर शुभकामना।”
कांग्रेस अध्यक्ष मल्लिकार्जुन खड़गे सेहो न्यायमूर्ति संजीव खन्नाकेँ मुख्य न्यायाधीशक रूपमे शपथ लेबाक लेल बधाई देलनि। ओ एक्स पर लिखलनि “भारतक ५१म मुख्य न्यायाधीशक रूपमे शपथ लेबाक लेल न्यायमूर्ति संजीव खन्नाकेँ बधाई। भारतक मुख्य न्यायाधीशक पद निस्सन्देह हुनक काँधपर बहुत भार राखत, किएक तँ एहि कार्यालयक संग व्यापक जाँच आ अपेक्षासभ जुड़ल अछि।”
ओ आगू लिखलनि, “हमरा विश्वास अछि जे अपन दीर्घ आ विशिष्ट अनुभवसँ ओ एहि दायित्वकेँ वहन करबामे सक्षम होयताह आ न्यायपालिकाकेँ विशिष्ट सेवा प्रदान करबामे सक्षम होयताह।”
न्यायमूर्ति संजीव खन्ना दिल्लीक निवासी छथि। ओ अपन पूरा पढ़ाई दिल्लीसँ कयलनि। हुनकर जन्म १४ मई, १९६० केँ भेल छलनि। न्यायमूर्ति खन्नाक पिता न्यायमूर्ति देश राज खन्ना दिल्ली उच्च न्यायालयक न्यायाधीशक रूपमे सेवानिवृत्त भेलाह। न्यायमूर्ति खन्नाक माता सरोज खन्ना दिल्ली विश्वविद्यालयक लेडी श्रीराम कॉलेजमे हिन्दीक व्याख्याता छलीह।
