भारतीय वायुसेना प्रमुख एयर चीफ मार्शल एपी सिंह रविकेँ प्रधानमंत्री नरेंद्र मोदीसँ भेट कयलनि। वायुसेना प्रमुख एपी सिंह काल्हि दुपहरियामे प्रधानमंत्री आवास पहुँचलाह। एतय ओ लगभग 40 मिनट धरि प्रधानमंत्रीसँ भेंट कय महत्वपूर्ण विषय पर जानकारी देलनि। एहिसँ पहिने शनिकेँ नौसेना प्रमुख एडमिरल दिनेश कुमार त्रिपाठी प्रधानमंत्रीसँ भेंट कय चुकल छलाह। वर्तमान समयमे ई भेंट काफी महत्वपूर्ण अछि। खास कय एहि समय आओर महत्वपूर्ण भ’ जाइत अछि जखनि पाकिस्तान विगत 10 दिनसँ नियंत्रण रेखा पर संघर्ष विरामक उल्लंघन कय रहल अछि।
22 अप्रैलकेँ जम्मू-कश्मीरक पहलगाममे आतंकी हमलाक बाद सुरक्षाबल द्वारा आतंकवादी सभक सर्च ऑपरेशन जारी अछि। पहलगामक आतंकी हमलामे आतंकवादी 26 निर्दोष पर्यटकक हत्या कए देने छल।
आतंकी हमलाक बाद सम्पूर्ण स्थितिक समीक्षा करबा लेल प्रधानमंत्री मोदी रक्षा मंत्री राजनाथ सिंह, तीनू सेनाक प्रमुख, चीफ ऑफ डिफेंस स्टाफ आ राष्ट्रीय सुरक्षा सलाहकार संग महत्वपूर्ण बैठक कयलनि। एहि दौरान सरकार सेनाक स्थितिसँ निपटबा लेल पूरा छूट दऽ देने अछि।
पहलगाममे भेल आतंकी हमलाक बाद सेना इलाकाकेँ घेराबंदी कय आतंकी पर शिकंजा कसय लागल अछि। एहिसँ परेशान पाकिस्तान नियंत्रण रेखा पर संघर्ष विरामक उल्लंघन कय रहल अछि। पाकिस्तान बीतल दस दिनसँ नियंत्रण रेखाक पारसँ गोलीबारी कय रहल अछि। एही परिस्थितिकेँ देखैत प्रधानमंत्री आ वायु सेना प्रमुखक बीच भेल मुलाकात काफी महत्वपूर्ण मानल जा रहल अछि।
सेनाक अनुसार, पाकिस्तानी सैन्य चौकीसँ 3-4 मई केर रातिमे गोलीबारी भेल। एहि गोलीबारी केर भारतीय सेना द्वारा तुरंत जवाब देल गेल। पाकिस्तानी सेना केर चौकी जम्मू-कश्मीर केर कुपवाड़ा, बारामूला, पुंछ, राजौरी, मेंढर, नौशेरा, सुंदरबनी आ अखनूर केर आस-पास केर इलाकामे नियंत्रण रेखा केर पार बिना कोनो उकसावाकेँ छोट हथियारसँ गोलीबारी कयल गेल। भारतीय सेना तुरंत आ सटीक तरिकासँ एकर जवाब देलक।
पाकिस्तान जतय एक दिसि लगातार नियंत्रण रेखा पर गोलीबारी कय रहल अछि ओतय दोसर दिसि ओ भारतीय सेनासँ जुड़ल संस्थान सभ पर साइबर अटैक सेहो कय रहल अछि। पाकिस्तान एखनि धरि भारतीय सेनासँ जुड़ल शिक्षण संस्थान, मेडिकल संस्थान आ वेलफेयरसँ जुड़ल वेबसाइट पर साइबर अटैक कऽ चुकल अछि। हालाँकि, पहिनेसँ सतर्क साइबर सुरक्षा एजेंसी सभ पाकिस्तानक इरादाकेँ विफल कय देलक।
