राष्ट्रपति द्रौपदी मुर्मू ३१ जनवरीकेँ भोर ११ बजे लोकसभामे संसदक दुनू सदनक संयुक्त बैसारकेँ सम्बोधित करथिन। एहि संबोधनक संग बजट सत्र औपचारिक रूपसँ शुरू होयत। संसदक बजट सत्र दू चरणमे होयत। पहिल चरण ३१ जनवरीसँ १३ फरवरी धरि चलत, जाहिमे १ फरवरीकेँ केन्द्रीय बजट प्रस्तुत कयल जायत। दोसर चरण १० मार्चसँ ४ अप्रैल धरि रहत।
राष्ट्रपतिक अभिभाषण पर धन्यवाद प्रस्ताव पर ३, ४ आ ६ फरवरीकेँ चर्चा होयत। 6 फरवरीकेँ चर्चाक बाद सरकार द्वारा जवाब देल जाएत। संसदीय कार्य मंत्री किरेन रिजिजू संसदक सुचारू संचालन सुनिश्चित करबाक लेल ३० जनवरीकेँ सर्वदलीय बैसार बजौलनि अछि। ओ विपक्षी नेतासभसँ रचनात्मक चर्चामे सहयोग करबाक अपील कयलनि अछि।
बजटक प्रति आशावाद व्यक्त करैत किरेन रिजिजू कहलनि जे वित्त मंत्री निर्मला सीतारमण १ फरवरीकेँ सन्तुलित आ व्यापक बजट प्रस्तुत करतीह। ओ कहलनि जे बजट सत्रक शुरुआत राष्ट्रपतिक अभिभाषणसँ होयत आ जनताकेँ सकारात्मक आ जनहितैषी बजटक आशा अछि।
